Siglir tar il cuntegn

Header

cuntegn

A partir dal 2021 Tarzisius Caviezel è nov president dals chatschaders grischuns

Ils delegads da l'uniun chantunala dals chatschaders da patenta han elegì Tarzisius Caviezel, quai ha el confermà sin dumonda da RTR. Fin uss è el stà vicepresident da l'uniun.

Purtret da Tarzisius Caviezel en il parlament a Tavau.
Legenda: Tarzisius Caviezel ch'è il mument vicepresident da l'uniun da chatschaders, daventa a partir da l'onn proxim il president. RTR

Ils delegads da l'Uniun chantunala dals chatschaders da patenta han elegì il landamma da Tavau Tarzisius Caviezel sco nov president. Quai cun 179 encunter 8 vuschs ed in'abstenziun. El cumenza questa incumbensa a partir da l'entschatta da l'onn proxim. Enfin uss è Caviezel vicepresident.

Tarzisius Caviezel succeda a Robert Brunold che sa retira suenter sis onns en uffizi en temps cun bleras sfidas per la chatscha Grischuna, uschia Caviezel. El saja conscient ch'el surprendia l'uffizi en temps cun bleras sfidas per la chatscha Grischuna.

Jau sai ch’jau surprend in job en quel ch’igl è grev da chattar soluziuns che plaschan a tuts.
Autur: Tarzisius CaviezelA partir dal 2021 president dals chatschaders da patenta

Pervi da la crisa da corona han ils delegads elegì il president en scrit e betg sco planisà gia mez matg a lur radunaza. Quella era vegnida annullada pervi dal scumond da sa radunar.

Ulteriurs nov elegids

Sco vicepresident è vegnì elegì Arnold Giger. Nov president da la cumissiun da tgira è Toni Hoffmann, nov president da scolaziun è Riccardo Ryffel e nov primtiradur è Ruggero Plozza, ch'è vegnì elegì en il segund scrutini. Responsabel per las relaziuns publicas resta Flurin Filli.

RTR novitads 09:00

Artitgels legids il pli savens

Scrollar a sanestra Scrollar a dretga