Il scumond absolut da far fieu vegn abolì, suenter che l’aura è sa midada la fin d'emna marcantamain. Quai communitgescha l'Uffizi da guaud e privel da la natira dal Grischun.
Malgrà che la situaziun è sa calmada, na saja il terren anc betg dapertut bletsch avunda. Cunzunt durant fasas da favugn vegnia il privel d'incendis puspè a crescher svelt. Perquai saja vinavant dad esser precaut. Il scumond era vegnì proclamà ils 11 da fanadur da quest onn. Tenor MeteoSvizra haja pluvì pli pauc be durant las stads dal 1983, 1984 e 2015.
