En il Grischun sa participescha be mintga segunda persuna cun dretg da votar a votaziuns ed elecziuns, ha Roman Hug argumentà l'idea che represchentants da la PPS giuvna han elavurà.
In studi da l'universitad da Friburg mussia, che cuvertas da votaziun prefrancadas augmentassan la participaziun per enfin 2%. Ed ils custs sajan modests cun 363'000 francs ad onn – tant pli che bleras votantas e votants vegnian vinavant a dar giu la cuverta sin vischnanca ed ils custs vegnian uschia ad esser pli bass.
I na va betg per francs e raps – i va per reducir in pussaivel obstachel.
Sustegn ha la PPS survegnì da la fracziun socialdemocratica e cristiandemocratica. Uss sto la regenza far ina proposta co reveder la lescha davart ils dretgs politics en il Grischun.
«La participaziun dependa betg d'ina marca»
La regenza grischuna era encunter. Il president Christian Rathgeb ha mess en dumonda l'effect: Prefrancar las cuvertas na portia betg bler – anzi quai fiss ina concurrenza per la pussaivladad da dar giu la cuverta da votar tar la vischnanca. Plinavant ha el fatg attent ch'ils custs na stettian betg en relaziun cun il niz.
Actualmain surpiglian nov chantuns en Svizra ils custs da porto per cuvertas da votaziun. En 11 chantuns fan singulas vischnancas quai voluntariamain.