Co che la cumissiun dal cussegl grond per politica da stadi e strategia scriva, haja ella predeliberà en duas sesidas la missiva da la regenza concernent il relasch d'ina lescha davart il princip da transparenza (lescha da transparenza). President da la cumissiun è Maurizio Michael (Castasegna). Present era er cusseglier guvernativ Martin Jäger sco schef dal departament d'educaziun, cultura e protecziun da l'ambient.
La populaziun duai avair dapli invista
La lescha duai reglar l'access a documents uffizials, là nua che quai è dumandà. Uschia duai ella pussibilitar, da tegnair in egl la lavur dals organs publics dal chantun.
Quai, tenor la communicaziun da la cumissiun, cun l’intent da «facilitar la libra furmaziun da l'opiniun, il diever dals dretgs democratics e la controlla da l'agir dal stadi sco er da rinforzar la chapientscha e la confidenza da la populaziun envers ils organs publics».
Dapli invista era sin livel regiunal e communal?
Ina minoritad da la cumissiun vul ir anc pli lunsch. Ella propona che las vischnancas e las regiuns vegnian era suttamessas a la lescha da transparenza. Sch'il cussegl grond seguiss a questa idea, stuessan er las radunanzas communalas e las sesidas dals parlaments communals esser avertas a la publicitad.
Dal rest è la cumissiun suandada per gronda part las propostas da la regenza.
RR novitads 10:00