Siglir tar il cuntegn

Chantun Accident A13 a Sufers – Mario Cavigelli vul far squitsch a Berna

Il Cusseglier guvernativ responsabel per las vias en il Grischun, Mario Cavigelli, vul che l'Uffizi federal per vias ASTRA, prenda mesiras en connex cun il lieu da l'accident sin l'A13 a Sufers.

Lieu da l'accident daventa probabel punct nair.
Legenda: Lieu da l'accident daventa probabel punct nair. RSI

Cunquai che l'A13 tutga tar la rait da vias federalas è numnadamain il ASTRA responsabel. Quellas mesiras pudessan, tenor Mario Cavigelli esser ina limita da tempo da 100 sin 80 km/h ed ulteriurs scumonds da surpassar. Sper quai vul Sufers motivar ulteriuras vischnancas da la regiun da tschertgar il discurs cun il chantun per far squitsch. Tenor Mario Cavigelli vegnia il chantun a sustegnair las pretensiuns da las vischnancas vers Berna.

Lieu da l'accident daventa probabel punct nair

Sin dumonda dal Radio Rumantsch di Eugenio Sapia dal ASTRA ch'i saja probabel ch'il tschancun nua che l'accident è capità daventa in punct nair e quai pervia da l'accident. In punct nair è in lieu nua che extraordinari blers accidents capitan. Calculà vegn quai cun ina furmla cumplitgada, uschia Eugenio Sapia. Sche il lieu daventa propi in punct nair vegn dentant per calculà la fin da l'onn.