Siglir tar il cuntegn

Header

Navigaziun

Via da chaminar, nua che l'accident è capità.
Legenda: Durant il Maiensäss è in buob da 14 onns sa disgrazià mortalmain. MAD, Polizia chantunala
cuntegn

Accident mortal Buob da 14 onns sa disgrazià durant Maiensäss

Al di tradiziunal dad ir a culm a Cuira, l'uschènumnà Maiensäss hai dà la gievgia in accident mortal. Curt avant las 17:00 sin la via aval cun la classa da scola è in buob da 14 onns crudà radund 200 meters d'ina spunda taissa giu. Tenor communicaziun da la Polizia chantunala haja il medi da la Rega mo pli pudì constatar sia mort. L'accident è capità en ina storta da la via d'alp da la Val Parghera Sura.

Manà tras il til per evitar panica

Ad ina conferenza da medias dal venderdi ha il cusseglier da la citad, Patrik Degiacomi, declerà pertge ch'ils responsabels n'han la gievgia betg ditg giu il til tradiziunal suenter il Maiensäss tras la citad. La raschun saja stada ch'els hajan vulì evitar ina reacziun da malsegirezza e sco consequenza caos.

Da quellas uras sa chattavan numnadamain gia 2'800 uffants – tranter quels er fitg blers anc pitschens uffants – en il center da la citad plus plirs milli geniturs. Engrevgiant saja vegnì vitiers ch'ils geniturs dal mat disgrazià n'avevan en quel mument anc betg pudì vegnir infurmads, malgrà ch'ils responsabels avevan tschertgà ils geniturs ed ins n'haja betg vulì tementar tut ils auters geniturs.

Il cussegl da la citad saja conscient che la decisiun da manar tras il til, possia vegnir mess en dumonda. I saja dentant stà ina decisiun a favur da la segirezza da tut quels che sa chattavan quel mument en la citad.

Procura publica e polizia sclereschan

Davart l'andament da l'accident n'ha Degiacomi betg dastgà s'exprimer. Da sclerir co che l'accident ha pudì capitar è numnadamain chaussa da la Polizia chantunala e da la procura publica. Las vias da viandar sajan sco usità anc duas emnas avant il Maiensäss vegnidas controlladas da la citad e sajan stadas en in bun stadi, ha confermà il cusseglier da la citad Tom Leibundgut.

Radund 2'800 scolaras e scolars èn sa participads la gievgia a l'eveniment che vegn gia fatg dapi 165 onns. La saira ha lura gì lieu il til costumà tras la citad da Cuira.

RR novitads 09:00