Siglir tar il cuntegn

Header

cuntegn

Chantun Activitads medias dals parlamentaris grischuns a Berna

Ils cussegliers e la cussegliera naziunala grischuna èn in zichel pli activs che matematicamain duaivel. Da las 1469 intervenziuns han Candinas, Brand, Semadeni, Hassler e Gasser inoltrà 32.

Ils parlamentaris grischuns en chombra gronda èn pia responsabels per 2.1 % da tuttas intervenziuns. Uschia èn els levet sut lur «duair». Ils 5 Grischuns fan ora 2,5 % da tuts 200 cussegliers naziunals. Quai demussan las cifras uffizialas dals servetschs dal parlament federal. Quellas èn vegnidas elavuradas dal team da datas da RTS ed SRF en collavuraziun cun partenaris en l’universitad da Neuchâtel. Las 1469 intervenziuns èn moziuns e postulats fatgas en il Cussegl naziunal durant da la legislatura currenta (dal december 2011 fin uss).

Candinas il pli activ

Inoltrà las pli bleras intervenziuns cun 12 moziuns e postulats en la legislatura currenta ha il cristiandemocrat Martin Candinas. El è s’engaschà en temas fitg divers da l’economia, sur il transport fin ad interna dal parlament. In veritabel focus tematic na para quai betg da dar tar Candinas sch’ins guarda mo sin sias intervenziuns.

Suandà vegn el da Heinz Brand da la Partida populara svizra cun 7 intervenziuns. Da quellas èn 3 da quintar en il sectur economia e 4 en il sectur immigraziun. Heinz Brand vala sco spezialist da dumondas d’immigraziun. El ha manà durant 24 onns l’uffizi da fatgs da polizia e da dretg civil dal Grischun.

Gasser a la cua…

Ensemen sin «plazza» 3 e 4 èn la socialdemocrata Silva Semadeni cun 6 intervenziuns ed il burgais-democrat Hansjörg Hassler 5. Sco sulet cusseglier naziunal grischun ha Hassler fatg en la legislatura currenta intervenziuns en il sectur agricultura. Quai na fa betg surstar damai che Hassler è pur ed era stà durant 12 onns president dals purs grischuns. Semadeni è s’engaschada pli ferm en il sectur economia. Da sias 6 intervenziuns èn 3 stadas en lez sectur. Sco unica ha ella dentant era fatg in’intervenziun sin il sectur da l’educaziun.

A la fin da quest classament sa chatta l’interprendider verd liberal Josias Gasser. El ha fatg 2 intervenziuns - omaduas en il sectur energia.

…dentant cun ils pli blers mandats

Auter vesa quai ora sch’ins cumpareglia ils lioms d’interess dals cussegliers naziunals. Là maina Gasser cun 20 mandats en differentas instituziuns ed interpresas avant Candinas cun 16, Semadeni cun 11, Brand cun 8 e Hassler cun 7. Dentant èsi da remartgar che 8 dals mandats da Josias Gasser han da far cun sias atgnas interpresas, sco la Gasser Baumaterialien SA u la do it SA a Cuira.

.

Il parlamentaris en chasa federala avessan d’inditgar lur lioms d’interess als servetschs dal parlament. Quels lioms èn mandats sco in post en in cussegl d’administraziun ch’ellas ed els tegnan en gruppas d’interess, instituziuns u interpresas privatas. La squadra da Tania Boa, Christa Gall, Timo Grossenbacher, Thomas Preusse e Pauline Turuban (RTS) en collavuraziun cun Stefano Puddu e Martin Péclat, Universitad da Neuchâtel) han elavurà las indicaziuns voluntarias ed empunì las rusnas cun indicaziuns ord il register da commerzi via il portal d’internet monetas.

Artitgels legids il pli savens