Il president da la Dretgira chantunala Norbert Brunner n'accepta betg la reprimanda da la cumissiun per giustia e segirtad dal Cussegl grond.
En ina communicaziun refusa Brunner tut las renfatschas che la cumissiun da giustia fa cunter el e contesta quella reprimanda, sco las gasettas da la chas'editura Somedia scrivan.
A la cumissiun da giustia renfatscha Brunner ultra da quai che quella n'avess gnanc dastgà pronunziar questa reprimanda cunter el, perquai che dus recurs dad el sajan anc pendents.
Plinavant declera il president da la Dretgira chantunala envers las gasettas che la cumissiun sco autoritad da surveglianza saja sa cuntagnida cuntrari al dretg. L'autoritad da surveglianza n'haja betg da sa maschadar en la giurisdicziun. Sia incumbensa sa restrenschia sin la surveglianza da l'administraziun giuridica e la gestiun.
Tenor la cumissiun per giustia e segirtad ha Norbert Brunner violà l'obligaziun d'uffizi tar ina dispita dad ierta. Brunner duai avair midà il dispositiv d'ina sentenzia uschia, che la decisiun finala saja sa midada. Quella midada haja el fatg senza consultar ses conderschaders. Brunner sez ha adina refusà quella renfatscha e refusa quai er uss.
Ord l'archiv:
