Siglir tar il cuntegn

Header

Sala da la Dretgira chantunala a Cuira.
Legenda: Keystone
cuntegn

Affera Dretgira chantunala Tribunal federal dat raschun a Schnyder

En connex cun l'affera enturn la Dretgira chantunala ha il Tribunal federal publitgà la mesemna ina nova sentenzia. Il recurs dal derschader, Peter Schnyder, cunter sia exclusiun d'in process è vegnì approvà.

Il derschader chantunal, Peter Schnyder, saja vegnì exclus senza basa legala d'in process davart in cas da partiziun d'ierta. Il Tribunal federal ha approvà il recurs da Schnyder. Il Tribunal federal vegn a la conclusiun che la Dretgira chantunala n'haja betg gì ina argumentaziun persvadenta per questa decisiun. La dretgira cumpletta n'haja betg la cumpetenza da midar il collegi giuditgant tar ina procedura pendenta.

Exact quai aveva però la Dretgira chantunala fatg en in cas da partiziun d'ierta. Uschia aveva la dretgira dispensà il derschader Peter Schnyder che manava il process e substituì quel cun la vicepresidenta da la dretgira. Peter Schnyder ha sin quai fatg recurs al Tribunal federal e survegnì raschun.

Sin in segund recurs dal derschader chantunal, Peter Schnyder, n'è il Tribunal federal dentant betg entrà en chaussa. Tenor la sentenzia actuala saja quel numnadamain vegnì inoltrà memia tard. En quel recurs gievi per ina dumonda da recusaziun dal derschader Schnyder cunter il president da la dretgira, Norbert Brunner.

La sentenzia dispitaivla en il cas da partiziun d'ierta dals 8 da matg 2019 da la Dretgira chantunala vegn per consequenza annullada e sto vegnir tractada anc ina giada da la Dretgira chantunala.

RTR novitads 12:00

Artitgels legids il pli savens

Scrollar a sanestra Scrollar a dretga