Siglir tar il cuntegn
Inhalt

Chantun Alberto Giacometti – Ina istorgia sco fatga per Hollywood

L’entschatta dal favrer è vegni communitgà, che Hollywood planisescha in film davart l’artist Grischun, Alberto Giacometti. «Final Portrait» duess il film sa numnar.

L’actur Australian, Geoffrey Rush vegn a giugar la rolla da Alberto Giacometti.
Legenda: L’actur Australian, Geoffrey Rush vegn a giugar la rolla da Alberto Giacometti. Reuters

Sco muster vala il cudesch «A Giacometti Portrait» dal criticher d’art American, James Lord. Ina persuna, ch’era in bun ami da Alberto Giacometti.

Marco Giacometti è president da la fundaziun Giacometti ed enconuscha bain la vita da ses antenat renumà Alberto Giacometti.

En il cudesch da James Lord, gioghian tranter auter las relaziuns d’Alberto Giacometti cun las dunnas ina rolla, declera Marco Giacometti. Spezialmain la relaziun cun la prostituada, Caroline. I saja natiralmain cler che uschia ina istorgia saja sco fatga per Hollywood.

Project è anc a la entschatta

Ma fin uss è tut speculaziuns. Bleras infurmaziuns davart il film na datti anc betg. Il project è anc a la entschatta. Cler è dentant che l'Australian, Geoffrey Rush vegn a giugar la rolla da Alberto Giacometti. Rush è tranter auter enconuschent dal film «The King’s Speech». Là gioga el in terapeut da lingua.