Siglir tar il cuntegn

Header

cuntegn

Alessandro Della Vedova «Dapli attenziun per l'italianità»

Il pli aut Grischun Alessandro Della Vedova guarda cun satisfacziun sin la sessiun da zercladur ed era sin ses onn sco president dal Cussegl grond – malgrà la crisa da corona.

Il cumenzament da ses onn presidial è stà pauc temp suenter ch'el n'è betg pli vegnì reelegì sco podestà da Poschiavo – a fin va ses onn sco pli aut grischun cun ina sessiun extra muros en la halla da la citad. L'onn sco pli aut Grischun è vairamain stà in spezial per Alessandro Della Vedova (PCD).

audio
Fin da la sessiun - intervista cun Alessandro Della Vedova
ord Actualitad dals 19.06.2020.
laschar ir. Durada: 4 minutas 12 Secundas.

Sia agenda cun termins da represchentaziun saja natiralmain sa svidada cun la crisa da corona, raquinta il Puschlavin. El haja dentant empruvà da tschertgar il discurs cun la populaziun per savair lur problems e quitads en quest temp dal lockdown.

Tuttina: Cun il titel sco president dal Cussegl grond speria el d'avair cuntanschì dapli attenziun per la lingua e la cultura taliana – betg mo en las valladas talianas mabain en l'entir Grischun.

Pli disciplinà e pli effizient

En la halla da la citad hajan deputadas e deputads lavurà pli conscienzius. Quai saja in bun signal e mussia la maturitad dal Cussegl grond.

Quest parlament n'è forsa betg uschè spectacular - decida dentant pragmatic ed en il senn da la populaziun.
Autur: Alessandro Della Vedova President dal Cussegl grond

Per el persunalmain saja magari stà grev da vesair sche deputadas e deputads hajan giavischà il pled, cunquai che la halla da la citad da Cuira saja uschè gronda.

La sessiun d'avust vegn Alessandro Della Vedova bain anc ad avrir, silsuenter surpiglia dentant Martin Wieland (PLD) quest'incumbensa.

RTR actualitad 17:00

Artitgels legids il pli savens