Allianza d'interess

Sco avant quatter onns: A las elecziuns dal Cussegl naziunal collia la partida socialdemocratica grischuna sia glista cun questa da la partida verdliberala. Quai saja in'allianza d'interess, uschia scriva la PS en ina communicaziun. La finamira saja d'evitar in segund sez per la PPS grischuna.

ils dus logos da las partidas PVL e PS Bild in Lightbox öffnen.

Legenda da maletgs: Sco il 2011 collian las duas partidas era quest onn lur glistas. RTR

Surtut giaja d'impedir l’elecziun da Magdalena Martullo-Blocher scriva la PS.
Era saja tenor la PS la pussaivladad dada da cuntanscher dus sezs grischuns per ils socialdemocrats a Berna.

La partida verdliberala saja ina partida burgaisa che haja sper las communabladads era cleras differenzas politicas. Era la lavur da la PVL en il Cussegl naziunal haja trumpà blers da la PS. En vista dal privel d'ina politica d'isolaziun nunsociala entras las partidas da dretg saja quai dentant necessari da colliar lur glistas, scriva la PS.

Verdliberals èn stads sfurzads

Entras la colliaziun da glista malponderada da la PBD, PCD e PLD e cun laschar da la vart ils Verdliberals sajan els stads sfurzads da colliar lur glista cun la partida socialdemocratica. Malgrà che ir sulet avess offrì pussaivladads attractivas per posiziuns accentuadas, dentant senza schanza d'elecziun, veglia la partida dals Verdliberals defender ses sez a Berna. Uschia piglia la PVL posiziun.

RR novitads 11:00