Suenter 17 onns sco president da la direcziun da la Banca Chantunala Grischuna vul Alois Vinzens sa retrair sin la fin settember 2019. Cun tants onns è Vinzens il CEO ch'è il pli ditg en uffizi en las fatschentas da bancas svizras, ha ditg il president da la banca, Peter Fanconi. Surpiglià la direcziun operativa da la banca ha Vinzens cun 43 onns.
Jau hai pudì esser 17 onns il CEO da la Banca Chantunala Grischuna cun fitg bels e buns onns. Uss hai jau prendì la decisiun ch'igl è avunda.
Vinzens vegnia a restar collià cun la banca er sur sia lavur sco president da la banca privata Bellerive SA a Turitg sco era sco commember dal cussegl d'administraziun da la Albin Kistler SA a Turitg, scriva la GKB en ina communicaziun. «Quai fa grond plascher a mai. Jau vai adina gì mes cor tar la Banca Chantunala e sun cuntent ch' jau dastg anc adina restar en quest conturn.» Dasperas vegnia el segiramain er a far chaussas en sia vita privata per las qualas el n'ha betg gì peda enfin uss.
La banca saja interessada da nizzegiar enavant las experientschas e cumpetenzas da lur CEO Alois Vinzens er suenter ch'el haja chalà, ha ditg Peter Fanconi. Vinzens sez sesa bain anc en cussegls d'administraziun, ha uschia dentant betg pli da far cun la lavur da mintgadi. Quai saja ina midada dal livel operativ sin il livel strategic, sco quai ch'el declera.
Là hai jau segir la pussaivladad da dar vinavant mias grondas experientschas ch' jau hai savì far sco schef da la banca sin il sectur da finanzas ed era quai che pertutga il manar d'ina fatschenta.
Da pussibilitar ina buna midada per il persunal e per ses successur – quai saja sia finamira per il proxim onn. Uschiglio n'haja el naginas finamiras concretas. A ses successur giavischa el, che tal haja il medem cletg e plaschair vida sia lavur, sco el haja gì durant quels 17 onns. Prender cumià e guardar enavos na veglia el oz dentant anc betg, accentuescha Vinzens pliras giadas. Chalar chalia el la finala pir en in onn. La tschertga d'in successur u ina successura dad Alois Vinzens ha gia entschet. La finamira saja, da pudair preschentar tal cun la midada da l'onn, sco quai che Peter Fanconi ha declerà.
Alois Vinzens cumenza tar la GKB
Gudogn resta sin livel da l'onn da record 2017
Cumpareglià cun la medema perioda da l'onn passà ha la banca fatg 0,7 milliuns dapli gudogn, vul dir 99,4 milliuns francs. Quai correspunda ad in augment da 0,8%. Uschia surpassa la banca levet il gudogn da l'onn da record 2017 ed era las spetgas ch'èn stadas previsas. Ils daners novs da clients èn s'augmentads per 2,3% per 683,9 milliuns francs.
Maioritad tar Albin Kistler SA
La Banca Chantunala Grischuna ha plinavant acquistà la participaziun da maioritad da 51% da l'administratura da la facultad, Albin Kistler SA cun sedia a Turitg. Las bunas experientschas hajan muventà da rinforzar la collavuraziun. La surpigliada vegn activada retroactivamain per il 1. da fanadur 2018.
Prognosa per 2018 meglra che spetgà
Pervi da las bunas cifras da semester auza la GKB sia prognosa per il 2018. Nov spetga la banca per la fin da l'onn in gudogn da 178 fin 183 milliuns francs. Il gudogn per scrit da participaziun (PS) vegn spetgà tar 75 francs.
RR novitads 07:30
