Siglir tar il cuntegn
Inhalt

Chantun «AlpTraum» – grev avegnir per l'economia en il Grischun

Sut il num AlpTraum preschenta il forum economic dal Grischun mesiras per il svilup a lunga vista da l'economia publica grischuna. En general duai la strategia cun la regiun da la Val dal Rain grischuna sco center multifuncziunal vegnir rinforzada, scriva il forum economic.

Legende: Audio Mezdi: Il svilup economic dal Grischun en futur abspielen. Laufzeit 04:40 Minuten.
04:40 min, Actualitad dals 22.10.2018.

La Val dal Rain grischuna cun Cuira sco center duai er vinavant esser il center economic dal Grischun. Ils accents sajan qua da metter sin l'industria orientada vers il futur e purschiders da servetschs. A questa conclusiun vegn il forum economic grischun en ses rapport cun il num cun dubel senn «Alptraum».

Il Grischun sa chatta en ina greva situaziun economica. Quai per ina pervia da la gronda distanza tar ils centers d'economia sco Turitg ni Basilea. Vitiers pateschan surtut las valladas da la depopulaziun.

Trais spazis d'aglomeraziun

Analisond las pussaivladads e ressursas dal chantun propona il forum economic da promover trais spazis d'aglomeraziun cun centers regiunals: numnadamain Cuira, Tavau/Claustra ed Engiadin'Ota. En quels lieus duai dar in stil da vita urban sco en la Svizra Bassa. Ils centers da quels lieus duain esser colliads en futur meglier che uss.

Dasperas duai dar intgins lieus cun in'infrastructura turistica sviluppada. Pervi da mancanza da populaziun e funcziun da center regiunal duain quels lieus betg porscher tut ils servetschs ch'i dovra per la vita quotidiana, sco per exempel uffizi da posta, banca, scolas etc. Il dumber da lieus da skis per exempel vegn uschia tendenzialmain a sa diminuir.

Sche nus vulain tegnair las valladas, lura stuain nus empruvar da tegnair ils centers en questas.
Autur: Peder Plazmanader da fatschenta forum d'economia dal Grischun

Ils ulteriurs lieus duain en emprima lingia esser lieus per abitar. Quels vegnan en futur mo anc ad avair a disposiziun paucs servetschs. Cunquai che blers da quest lieus vegnan a vegnir duvrads mo sco segund lieu d'abitar, vegnan els a sumegliar a vitgets da primarans.

Schlargiar purschida da furmaziun

Grazia ad ina purschida da furmaziun schlargiada sin il stgalim terziar ed attractivas plazzas da lavur, duai vegnir evità che giuvenils bandunan il Grischun. En il medem mument duain novas furmas da lavur e d'abitar sco er ina meglra mobilitad attrair famiglias giuvnas en il Grischun.

RR actualitad 12:00