Siglir tar il cuntegn

Header

cuntegn

Als giuvens tutga il mund Las partidas giuvnas pon dasdar la politica grischuna

Tut quai ch’ha da far cun il temp liber è scumandà. Tranter auter patescha la giuventetgna fermamain da las mesiras da corona. Quest fatg motivescha els dentant era d’entrar en la politica.

Il dumber da commembers s'augmenta

Pervia da las restricziuns da corona tema la giuventetgna per ses futur, constatescha Nico Züllig il vicepresident dals Giuvens liberals. Ils giuvens han la voluntad e gust da politisar e d’influenzar la situaziun actuala. Chattar novs commembers è daventà pli simpel cumpareglià cun avant la pandemia.

Sumegliant èsi era tar la Giuvna partida populara dal Grischun. Il president Simon Schmid di, ch’els hajan gì enturn tschintg novas annunzias entaifer in’emna. La dumonda saja dentant ussa, sch’i sa tracta tar las annunzias da persunas ch’èn viladas pervi dal lockdown u sche l’interess vi da la politica va sur quai ora. Era tar ils giuvens socialists crescha il dumber da commembers declera la presidenta Rosalina Müller.

audio
Corona mobilisescha dapli commembers da partidas
ord Actualitad dals 12.04.2021.
laschar ir. Durada: 2 minutas 58 Secundas.

Betg exnum dapli commembers entras la pandemia ha la Giuvna partida burgais-democratica, ils Giuvens verd-liberals e la Giuvna partida cristiandemocratica. Il pli grond success cun recrutar nova glieud han els normalmain entras s'entupadas socialas – per exempel tar ina grillada, manegia Fabian Collenberg dals cristiandemocrats. Pervia da corona èn dentant tut quellas occurrenzas idas da la glatscha giu.

Ils giuvens auzan la vusch

Cuntrari a las partidas-mamma han las partidas giuvnas dal Grischun per ordinari damain resursas finanzialas e persunalas. Ma tuttina vegnan lur pretensiuns adina puspè tematisadas en ils parlaments communals, chantunals e federals. Per che lur vusch vegnia udida, van els era vias nunconvenziunalas. Il vicepresident dals Giuvens liberals, Nico Züllig, declera, che «connections» sajan in da las pitgas impurtantas, sch’i va per far politica en giuvens onns.

audio
Co vegnan partidas giuvnas udidas?
ord Actualitad dals 12.04.2021.
laschar ir. Durada: 2 minutas 48 Secundas.

Vinavant declera Nico Züllig ch’ins sa scuntria regularmain cun la Partida liberaldemocratica per plazzar lur pretensiuns. Il barat cun deputads dal Cussegl grond u era cun il cusseglier guvernativ Christian Rathgeb saja da gronda valur. La partida-mamma prendia serius tge ch’els dian e gidia da purtar ils temas en ils parlaments. Che questa metoda funcziuneschia fitg bain conferman sin dumonda era tut las autras partidas giuvnas dal Grischun.

RTR actualitad 07:00

Artitgels legids il pli savens