Siglir tar il cuntegn

Header

cuntegn

Chantun Anc avund'aua – malgrà las chaliras

Malgrà las chaliras e la sitgira da las ultimas emnas, èn las reservas d'aua en Grischun anc tut normalas. Ni il spievel da l'aua sutterana ni quel dals flums e lais è per il mument alarmant.

Durant l'enviern e surtut durant il mais matg hai dà autas quantitads da precipitaziuns. Quai vul dir ch'il spievel da l'aua sutterana era la fin da matg en media. Quai è era uss anc uschia, malgrà la sitgira e las chaliras da las ultimas emnas. Tenor Daniel Güttinger da l'Uffizi chantunal per natira ed ambient è quai numnadamain normal, ch’ils spievels da l'aua sutterana sa sbassan durant ils mais da stad.

audio
Bunura: Avunda aua en il Grischun malgrà la sitgira
ord Actualitad dals 21.07.2015.
laschar ir. Durada: 3 minutas 19 Secundas.

Betg da cumparegliar cun 2003

Sumeglianta è la situaziun tar ils spievels dals flums e lais. Là datti per il mument flums che mainan pli pauc'aua ch'en media, ma era da quels che mainan dapli aua ch'en media.

La situaziun actuala n'è cunquai betg da cumparegliar cun quella dal 2003. Lura eri gia davent da l'avrigl sitg e chaud. Perquai hai durant lezza stad dà restricziuns da duvrar aua. Da quai èn ins per il mument dentant dalunsch davent, di Daniel Güttinger.

Sch'i vess dentant da restar anc pliras emnas uschi chaud e sitg sco las davosas emnas, pudessi daventar critic per l'aua sutterana e per ils flums e lais grischuns. Sche las prognosas da l'aura per ils proxims dis constattan dentant, n'è quai betg da spetgar.

Artitgels legids il pli savens