Siglir tar il cuntegn

Header

audio
Emprim di da scola – anecdotas da scolasts
Or da Actualitad dals 19.08.2019.
laschar ir. Durada: 2 minutas 2 Secundas.
cuntegn

Anecdotas da scolasts «Quai èsi stà per mai. Jau na vegn betg pli»

Cunquai ch’i è ina gronda midada en la vita dals uffants procura quai er per gnervusitad, tema e tensiun. Quai dentant er da la vart dal scolast. Uschia na va la planisaziun betg adina si. Ord quai naschan alura anecdotas.

Quest onn datti puspè blers students ch’han serrà giu ses studi e che cumenzan quest onn sco scolast. Curt suenter il studi vegnan blers bittà en l’aua fraida. Quai procura era per situaziuns nunspetgadas. Or da quai naschan bleras anecdotas. Scolasts che lavuran dapi onns sin quai mastergn raquintan.

Staschia Janett, scolasta primara da Scuol

Ella sa regorda fitg bain a ses emprim di sco scolasta primara. A Bravuogn ha ella gì da pertgirar 3 classas. Tenor ella haja il di cumenzà fitg abrupt. Quai di ha ella empruvà dad esser ina chara scolasta. I ha dentant dà in uffant che n’è insumma betg stà cuntent cun la nova situaziun dad ir a scola. «In uffant è svanì sut il banc da scola ed ha cumenzà da bragir». Ella saja vegnida in zichel malsegira, tuttina saja il di lura passà fitg bain.

Domenica Steier, scolasta primara da Savognin

Blers uffants èn adina plain mirveglias. L’emprim di da scola haja ina mattatscha ch’ha quai di gest cumenzà la scola fatg a la scolasta Domenica Steier ina dumonda nunusitada. Ella m’ha dumandà: «Cura datti gentar?» La scolasta haja lura detg ch’i dettia gentar da las 11:30, cura ch’ella giaja a chasa. Sinaquai haja la mattatscha respundì: «Na, quai va a mai memia ditg, jau hai ussa dad ir ora a magliar insatge.»

Gierina Michael, scolasta primara da la Val Schons

Gierina Michael raquinta in’anecdota ch’ina collega da lavur haja raquintà ad ella. Ins sa ch’uffants pitschens han savens naginas retegnientschas da dir tge ch’els pensan. E quai ha in uffant fatg durant ses emprim di da scola. Quel na saja insumma betg stà cuntent cun la scola. Suenter la scola haja il buob prendì sias pantoflas è ditg: «Quai èsi stà per mai. Jau na vegn betg pli!»

RR novitads 07:00

Artitgels legids il pli savens