Siglir tar il cuntegn

Chantun Anecdotas dad Eugen Peter al maraton da l’Engiadina

Eugen Peter s’engascha vid il maraton da skis da l'Engiadina, quai dapi l'entschatta. El è stà en tut 22 onns president dal comité d’organisaziun. Oz organisescha el anc ils aperitivs per curriders da cursas da worldloppet ed è commember d’onur.

Eugen Peter sin ses balcun cun la vista vers il guaud da Staz.
Legenda: Davent da ses balcun po Eugen Peter vesair il guaud da Staz. Tras quest guaud maina er il maraton da l’Engiadina. RTR, F. Caduff

Preparar loipas da passlung cun skis d’alpin

Preparar las loipas da passlung per ils 42 kilometers dal maraton n’era pli baud betg uschè simpel. I na deva betg anc las maschinas per far loipas, uschè che tut durava pli ditg. Perquai han ins ina giada en l’istorgia dal maraton empruvà ora ina fitg speziala tactica per far las loipas per far passlung classic. Ins è charrà cun ina maschina da far pista da las pendicularas da San Murezzan e tratg suenter dus umens cun skis d’alpin ch’eran liads vid la maschina cun ina sua. In da quels umens era Eugen Peter sez.

Dal classic al skating

Ils emprims maratons èn vegnids fatgs da tut ils curriders en il stil classic. Il stil da skating n’era anc betg enconuschent da quest temp. Al maraton da skis engiadinais è però vegnì fatg l’emprim pass envers il stil da skating e quai cun il pass da Siitonen. Il currider finlandais Pauli Siitonen ha absolvà in maraton cun mo in ski en la lingia da classic e cun l’auter ha el fatg il moviment da skating. La tactica da Siitonen è vegnida sviluppada vinavant fin tar il skating, la tecnica enconuschenta dad oz.