Durant il settember haja quai dà discurs tranter l’uniun d’apotechers grischuns e l’uniun da medis grischun. Quels èn vegnids organisads ensemen cun il departament chantunal da giustia segirtad e sanadad ed in moderatur extern. Il cuntegn da quels discurs èn: La dumonda da la distribuziun da medicaments, la dumonda da la qualitad dal cussegl da pazients en praticas ed apotecas, l’organisaziun da scolaziun communabla per medis ed apotechers e l’organisaziun dal servetsch d’urgenza. En il proxim temp duaja quai dar ulteriurs discurs da scleriment tranter apotechers e medis. Quai ha detg il schef dal departament da giustia, segirtad e sanadad Christian Rathgeb en l’ura da dumondas dal Cussegl grond.
Era anc las virolas
Il problem tranter apotechers e medis è, che medis na dastgan betg pli dar ora medicaments sez senza limita. Quai fissan però impurtantas entradas per ils medis. Qua pudessi dar in connex cun la mancanza da medis da chasa en il Grischun. In ulteriur aspect è ch’il dretg da virolar – e las entradas da quel servetsch – van tenor la lescha federala davart las professiuns medicinalas era dals medis vi als apotechers, sco l’uniun da medis ha communitgà la fin settember: «Ins pren puspei enzatgei naven als miedis e dat quei als apotechers, senza ch’ei vegn enzatgei anavos.».
Avant che quai vegnia implementà dovria quai dentant anc ina nov’ordinaziun, ed ils apotechers ston ademplir intginas premissas. Ina da quellas è, ch’ils apotechers stoppian esser abels dad «ir entuorn cun cumplicaziuns», sco l’uniun da medis scriva en il communitgà.
Tge ston ils apotechers savair?
La deputada Angela Casanova-Maron da Domat ch’è en la suprastanza da la Cassa da cumpensaziun dal mastergn Grischun/Glaruna ha dentant fatg attent: Betg far anc dapli pretensiuns envers ils apotechers. I saja era da ponderar che tar ils medis na fetschian betg ils medis sez mabain las gidantras, ils gidanters las vaccinaziuns. Las pretensiuns astgian dentant betg vegnir lumiadas memia fitg ha ditg la deputada Anna-Margreth Holzinger da Schiers che sesa en il cussegl d’administraziun da Grisomed, ina rait da medis en il Grischun.