L'Engiadina ha in status tut spezial tge che pertutga l'art. Nigliur en il Grischun datti insatge sumegliant. Nigliur è la concentraziun da gallarias u occurrenzas e festivals d'art uschè auta.
Il mund d'art viva dentant er en autras regiuns. L'artista e manadra da la chasa Cularta a Laax, Yvonne Gienal, di ch'i haja er dà en Surselva in grond svilup ils ultims decennis. I giaja adina dapli. Ella patratga per exempel vid la chasa d'Angel a Lumbrein, vid la chasa Melna a Flem u vid Art Safiental. Plinavant dettia en Surselva er blers museums. Cumparegliar na pon ins tuttina betg la situaziun cun quella en l'Engiadina.
Tenor Stephan Kunz, directur dal Museum d'art Grischun a Cuira, saja la situaziun en Engiadina simplamain particulara. Ina tala purschida na chattian ins strusch insanua auter en Svizra. Ins na dastgia dentant betg emblidar ch'i marschi en l'entir chantun bler. Exposiziuns d'art, per exempel, sajan en l'entir Grischun fitg popularas.
