Siglir tar il cuntegn

Header

Navigaziun

Legenda: Guardar il video Assicuranza d'edifizis cun sperdita da milliuns. Durada 02:23 minutas.
Or da Telesguard dals 02.05.2019.
cuntegn

Assicuranza d'edifizis Sperdita da milliuns cunzunt pervia da la bursa

L’Assicuranza d’edifizis dal Grischun (GVG) ha fatg l'onn passà ina sperdita da 18,4 milliuns francs. Quai cunzunt pervi dal schlet onn a la bursa ch’ha chaschunà in minus da passa 16 milliuns francs.

Quitads na fa quest minus betg al directur da la GVG, Markus Feltscher: Sch’ins faschess ussa la bilantscha cun las aczias, lura fiss l’assicuranza puspè en il plus. «Quai è normal ch’i va ensi ed engiu tar las aczias», uschia Feltscher. «L’onn passà è simplamain betg stà in bun onn a la bursa.» Consequenzas per las premias na haja il minus dal 2018 en mintga cas betg. Quai stoppia succeder in cas pli grev per che la GVG auzia las premias.

In onn «lungurus»

Quai che pertutgia ils donns elementars e da fieu, saja l’onn passà stà in onn tut normal. La summa da donns munta a 18,8 milliuns francs.

En quest senn èsi stà in onn fitg lungurus, pertge la summa da donns è pli u main restada en la media dals ultims 10 onns.
Autur: Markus FletscherDirectur Assicuranza d'edifizis dal Grischun

L'onn passà hai atgnamain dà blers cas cun donns elementars – total 1599 cas. Cumpareglià per exempel cun l’onn avant è quai trais giadas dapli (514 cas il 2017). La summa totala dals donns elementars era dentant cun 9,5 milliuns francs pli bassa che dal 2017 (14,2 milliuns francs). Lezza giada han la bova a Bondo chaschunà auts custs.

Ils pli blers cas da donn hai dà il 2018 pervia dal stemprà Burglind l’entschatta da schaner (800 cas) e pervia dal squitsch da la naiv (675 cas).

Fieu fatschenta cunzunt il 2019

L’onn passà è stà in onn tut normal quai che pertutga ils donns da fieu. Quest onn pudess dentant vegnir in onn extraordinari, cun tut ils gronds fieus ch’igl ha gia dà il 2019. Gia ussa, il cumenzament da matg 2019, è la summa da donns entras fieu cun passa 9 milliuns francs uschè auta sco l’entir onn passà.

Nus avain gia ussa duvrà 80% da noss budget.
Autur: Markus FeltscherDirectur Assicuranza d'edifizis dal Grischun

El cuntinuescha però, che quai na saja nagut tragic. Tals onns datti adina puspè.

RR actualitad 17:00