Siglir tar il cuntegn

Chantun Atun è temp da kino - Ma tge dovri ch'in film vegn en il kino?

Cura che las sairas vegnan pli curtas ed i vegn pli fraid na pensa nagin pli dad ir sper il lai a baiver in, ubain a grillar la saira suenter la lavur. Perquai cumbattan cunzunt ils gronds producents da film per ils termins d'atun en il program da kino per lantschar novs films.

Sco cineast pitschen n'èsi betg simpel da dumagnar l'agen film en ils kinos.
Legenda: Sco cineast pitschen n'èsi betg simpel da dumagnar l'agen film en ils kinos. Keystone

Pervia da la gronda concurrenza n’èsi sco cineast pitschen betg simpel da dumagnar l'agen film en ils kinos. A la cineasta rumantscha, Susanna Fanzun èsi gartegià da vegnir cun ses film «Kühe, Käse und 3 Kinder» en ils kinos la stad passada. Ella ha elegì la via sur il distributur. Quai vul dir ch'ella ha preschentà ses film, oriundamain producì per la televisiun ad in distributur da films e quel era da l'avis ch'i valia da mussar il film en ils kinos.

Ina chaussa da fortuna

Quella via dovra dentant spezialmain fortuna perquai che normalmain cumenza la collavuraziun tranter distributur e cineast gia durant la producziun dal film e betg pir cura ch'il film è gia finì sco en il cas da Susanna Fanzun.

E tiers vegn che p. ex il distributur da Susanna Fanzun elegia be mintgamai dus films finids ad onn. Pia cleramain ina chaussa da fortuna sch'ins resguarda ch'ils responsabels guardan mintga di films da cineasts che avessan gugent che lur film vegnissan en ils kinos

Ubain far sez tut

La cineasta/il cineast po natiralmain er far sez tut la lavur en connex cun il kino. La lavur da contactar tut ils kinos che vegnissan en dumonda e l'entira lavur da promoziun dovra dentant bler temp. E quel n'han blers cineasts betg anc sper la lavur da reschia e da producziun.

La cineasta rumantscha, Susanna Fanzun.
Legenda: RTR
Blers films da kino na dessi betg senza la televisiun.
Autur: Susanna Fanzuncineasta rumantscha

La televisiun è savens co-producenta da films da kino. Be uschia possian blers films insumma vegnir finanziads, di Susanna Fanzun. In film da kino rendi numnadamain be sch'el saja propi in grond success. Daners portia la vendita da dvds ed ils films che vegnian chargiads giu.

.