Durant bunamain in mais n'han ils da Cunter en il Partenz betg pudì duvrar l'aua sco usità. Els han stuì buglir giu ella avant che duvrar - quai perquai che l'aua era contaminada cun bacterias da fecalias.
Il cas Cunter è in cas spezial
Quai saja in cas che na vegnia betg avant savens, uschia il chemicher chantunal Matthias Beckmann. I saja dentant adina e dapertut pussaivel che l'aua vegn contaminada. Per evitar quai vegnan fatg bleras controllas. Tut tenor nua che la funtauna sa chatta schizunt fitg savens.
Cunzunt plievgia intensiva ed animals sco vatgas pon far problems a las funtaunas. Sche in'alp sa chatta en il lieu nua che l'aua per ina funtauna sa rimna èsi cu i plova pussaivel, ch'il terren na vegn betg da filtrar bain avunda l'aua. Uschia èsi pussaivel che bacterias pon vegnir en l'aua.
Per regla è l'aua da baiver grischuna da fitg buna qualitad
Da quels cas na dettia quai dentant betg savens, uschia Matthias Beckmann. Mo radund 2-4% da las emprovas sajan betg bunas. E savens sajan er quellas ch'èn betg bunas mo pauc sur las limitas e gia tar la proxima emprova è tut puspè en urden.
Sut il stritg haja il Grischun numnadamein fitg bun'aua. Il problem saja simplamain che quai na vegnia betg tematisà. Be sche l'aua n'è betg buna saja quai in tema.
Cuira è en ina situaziun confortabla
En la citad da Cuira na pudess il medem sco a Cunter betg capitar. La chapitala posseda numnadamain sis reservuars e sper quai anc aua sutterrana.
Pia er sche tut ils reservuars crudassan or fissi senza problems pussaivel da vegnir or cun l'aua sutterrana u il cuntrari, uschia Guido Calörtscher da l'IBC, l'interpresa ch'è responsabla per il provediment d'aua a Cuira.
RR actualitad 12:00