Siglir tar il cuntegn

Header

video
Il privel da lavinas
Or da Telesguard dals 29.01.2021.
laschar ir
cuntegn

Aura pli miaivla Privel da lavinas per part anc adina aut

Suenter las scleridas da la dumengia vai il glindesdi avantmezdi vinavant cun fasas suleglivas. Il privel da lavinas resta grond, surtut en parts da la Surselva, il Grischun Central ed en Engiadina Bassa . Las bleras vias èn avertas ed il traffic public cursescha tenor urari.

Anc adina èsi da far attenziun en l'entir chantun Grischun pervi da lavinas. L'institut da naiv e lavinas a Tavau annunzia in privel da lavinas grond stgalim 4, per la vart dal sid dal Rain anteriur en Surselva, sur il Plaun, Grischun central, Engiadina Bassa e Samignun. Per l'ulteriur territori dal Grischun vala in privel da lavinas considerabel, stgalim 3.

Carta da lavinas SLF
Legenda: Privel da lavinas cotschen-nair: fitg grond, cotschen: grond, oransch: considerabel, mellen: moderà, verd: pitschen. (stan 31.01.2021 a las 17:00) SLF

Cundrizs d'observaziun èn sa cumprovads a Mustér

La gievgia valeva sisum la Cadi il pli grond privel da lavinas, stgalim 5. Vers saira aveva lura l’Institut da naiv e lavinas a Tavau sbassà quel sin stgalim 4.

Per il stab da crisa ha il privel da lavinas muntà ils davos dis blera lavur dad observaziun, coordinaziun e communicaziun. Ch'il chantun ha investì ils ultims onns blers daners en cundrizs stabels per observar lavinas saja uss sa cumprovà en la regiun da Mustér e Val Tujetsch. Quels gidian numnadamain mintgamai per analisar la situaziun en cas da privel, ha ditg in represchentant da l'Uffizi da construcziun bassa envers RTR.

Privel d'inundaziuns è sa quietà

Suenter la blera plievgia dals davos dis ha er il privel d'inundaziuns fatg quitads – per l'ina pervi da la plievgia sezza e per l'autra pervi da la naiv che lieua. Entant è la situaziun dentant sa calmada in pau en Grischun. Sco il meteorolog da SRF Meteo Felix Blumer ha declerà il venderdi envers RTR, stoppian ins dentant tegnair en egl la situaziun:

Situaziun sin via e binaris

Naiv hai sin las vias en l'Engiadin'Ota tranter Malögia e Brail, da Vinadi a Samignun; en Surselva da Glion a Val S. Pieder, da Mustér a Tschamut u a Fuorns ed en il Scanvetg tranter St. Peter ed Arosa. Er naiv hai sur ils pass dal Bernina, Fuorn, Güglia e Malögia.

Impediments da traffic datti anc:

  • Pass dal Lucmagn è serrà per motivs da segirezza
  • tranter Sedrun ed Andermatt na curseschan nagins trens

Prognosa da l'aura

Il glindesdi avantmezdi èsi per part anc sulegliv. Il suentermezdi èsi surtratg e cunzunt en il nord dal Grischun plovi. Il cunfin da naiv è tar radund 1'300 meters. A Cuira datti damaun enturn 8 grads.

Mardi datti per part sulegl, per part èsi cuvert e magari plovi. En general èsi en il sid pli amiaivel ch'en il nord.

RTR novitads 12:00

Artitgels legids il pli savens

Scrollar a sanestra Scrollar a dretga