Tut ils scolars da Cla Schur fan actualmain l'examen cun in automat. Suenter otg fin nov mais tira il scolast d'ir cun auto in facit fitg positiv da la nova lescha. El sappia metter uss il focus da las lecziuns sin chaussas pli relevantas sco guardar ordavant e sin vesair ils privels sin via. In aspect negativ na vesa el betg.
Pli grond privel sin via?
Il privel sin via na saja betg vegnì pli gronds, manegia Cla Schur. El na crai betg ch'ina persuna che fa l'examen cun in automat va suenter conscientamain cun in auto cun midada da girs.
Jau cussegl al scolar da far l'examen cun in automat. E cura ch'il ir cun auto è automatisà, lura recumond jau da far duas fin trais lecziuns cun in auto cun midada da girs.
In'autra opiniun ha il scolast Rolf Schindler da Sursaissa. El na crai betg ch'in scolar vegnia d'emprender dad ir cun in auto manual en dus fin trais lecziuns.
Jau crai ch'i dovra dapli che mo duas u trais lecziuns per ch'ins emprenda da midar gir en las differentas situaziuns, per exempel en situaziuns da stress.
80% dals scolars dad el fetschian anc adina l'examen cun in auto manual. Quai mussa, che blers hajan anc adina il desideri da savair ir cun omadus autos. Er a Rolf Schindler èsi cler, che l'automat vegn ils proxims onns a stgatschar l'auto cun midament da girs. Tenor el saja questa lescha vegnida 5 onns memia baud.
RR actualitad 08:00