Siglir tar il cuntegn

Header

cuntegn

Chantun «Avais Vus gia vis noss'abitaziun?»

En il center da transit a Trimmis abitan 100 persunas. 10 giuvenils fan quai schizunt en ina abitaziun communabla – ina visita.

En occasiun dal di da las portas avertas han blers indigens visità l’anteriura ustaria Bahnhöfli gist dasper la staziun dal tren Trimmis/Vaz Sut. Dapi in onn datti là il center da transit. Cunzunt Afgans ma era Sirians ed Eritreans chattan qua in suttetg. Bunamain la mesadad èn giuvenils. Tiers vegnan anc bleras famiglias.

Ina abitaziun communabla, duos chombras da durmir e diesch giuvenils

audio
Invista en il center da transit Trimmis
ord Total local dals 19.06.2017. Maletg: RTR, Gian-Marco Maissen
laschar ir. Durada: 4 minutas 55 Secundas.

Al di da las portas avertas scumpartan giuvens, sin la terrassa sin il tetg té verd e nair sco era snacks afgans. Mintga visitader vegn beneventà cordialmain dals giuvens umens en cuschina. In dad els è Modjtaba, 18 onns ed oriund dal Afghanistan. Ensemen cun ses frar è el ussa dapi quatter mais a Trimmis. Avant èra el a Lizirüti e Tavau. Tut en tut è el ussa gia dus onns en Svizra.

Modjtaba guarda tras la fanestra da la cuschina, nua ch'els preparan il té per ils giasts.
Legenda: Modjtaba guarda tras la fanestra da la cuschina, nua ch'els preparan il té per ils giasts. RTR, Gian-Marco Maissen

Emprender tudestg, far fitness e discurrer cun ils auters

Modjtaba ha in permiss provisoric, vul dir in F. Cun quel dastgass el schon lavurar. In fufragnadi tar in mecanist d’autos ha el era gia pudì far. Quai haja plaschì bain. Dentant survegnir ina plazza saja schon pli difficil. Blers n'han betg uschè fiduzia en persunas cun in F. Perquai emprenda el ussa vinavant tudestg e sperescha d'in bel di pudair far ina scolaziun. Quai è era ses siemi. D’avair en tschintg onns ina famiglia, ina lavur ed in agen da chasa. Per il mument na saja quai dentant anc betg pussibel. Ussa va el la damaun a scola, il suentermezdi fa el in pau fitness e lura vegn discurri bler in cun l’auter. Simplamain star enturn e durmir chattia el lungurus. Quai na veglia el betg far.

La chombra da cumpagnia per ils diesch giuvenils.
Legenda: La chombra da cumpagnia per ils diesch giuvenils. RTR, Gian-Marco Maissen

A nus manca anc l'emprim plaz

Superbi han ils giuvens mess en scena ils buccals da turniers da ballape als quals ch’els han participà. Plirs segunds plaz e terzs plazs pon ins vesair. L’emprim plaz manchia anc, manegia Modjtaba. Quel vulani lura gudagnar al proxim turnier. El sez na sa betg pli dar. El s’haja ina giada fatg mal fermamain ed haja stuì chalar cun ballape. El haja ussa il fitness che saja ses sport.

Superbi èn vegnids preschentà ils buccals da turniers da ballape.
Legenda: Superbi èn vegnids preschentà ils buccals da turniers da ballape. RTR, Gian-Marco Maissen

Artitgels legids il pli savens