Siglir tar il cuntegn

Header

video
Il return dal retg da las Alps (grazia a fraudaders)
Or da RTR Social dals 19.06.2020.
laschar ir
cuntegn

Avant 100 onns Il capricorn returna en il Parc Naziunal Svizzer

Bunamain fiss il capricorn svanì per adina da ses da chasa. Sur onns han ins empruvà cun pliras acziuns da recolonisar il capricorn. Avant precis 100 onns è precis quai gartegià en il Parc Naziunal Svizzer.

Savens è il capricorn enconuschent sco il retg da las Alps. E tuttina fiss gist il capricorn avant onns bunamain vegnì extirpà dals umans. Grazia a pliras acziuns da recolonisaziun viva il capricorn ozendi anc adina en nossas alps.

Nagin capricorn pli en Svizra

Gia durant il 16avel tschientaner n'eran las cundiziuns da viver betg simplas per il capricorn. Nauschas racoltas han lura manà tar quai ch'ils umans èn ids intensivamain a chatscha dals capricorns. Gia il 1640 era il capricorn mort ora en il chantun Grischun. Il 1809 è il davos capricorn en Svizra vegnì mazzà en il chantun Vallais.

Il comeback dal capricorn

Davent dal 19avel tschientaner hai lura puspè dà sforzs da purtar enavos il capricorn en Svizra cun diversas acziuns da recolonisaziun. Gia avant l'emprima Guerra mundiala èsi uschia gartegià da recolonisar il capricorn en tschertas regiuns dal Grischun, per exempel al Piz Ela u al Piz Albris.

Ils 19 da zercladur 1920 èsi lura gartegià dad er recolonisar il capricorn en il Parc Naziunal Svizzer. Set chistas cun capricorns èn arrivadas a Zernez sin la staziun. L'auter di èn ils capricorns vegnids relaschads en il Parc Naziunal Svizzer. Silsuenter èn adina dapli capricorns vegnids transportads enavos en Svizra. Oz vivan bun 300 capricorns en il Parc Naziunal Svizzer. En las alps datti en tut circa 40'000 capricorns.

RTR actualitad 11:00

Artitgels legids il pli savens

Scrollar a sanestra Scrollar a dretga