Siglir tar il cuntegn

Header

video
Alberto Giacometti – ina curta revista
Or da Telesguard dals 11.01.2016.
laschar ir
cuntegn

Chantun Avant 50 onns è mort Alberto Giacometti

Ils 11 da schaner 1966 è mort il sculptur Alberto Giacometti en l’Ospital chantunal a Cuira.

Gia durant sia vita è l’artist daventà fitg renumà. Lavurà e vivì ha Alberto Giacometti ensemen cun ses frar Diego a Paris. Ed adina puspè è el turnà en Val Bregaglia, nua ch’el è naschì e creschì.

Ovras dad Alberto Giacometti: 'Grande Femme III', 'Grande Tête' e 'Homme qui marche II'.
Legenda: Ovras dad Alberto Giacometti: 'Grande Femme III', 'Grande Tête' e 'Homme qui marche II'. Keystone

Sculpturas da milliuns da francs

Ina da las pli impurtantas ovras dad Alberto Giacometti è la sculptura «L’Homme qui marche». Ella ins chatta sin la bancnota da 100 francs. Ed ella è vegnida ingiantada avant 6 onns per 110 milliuns francs.

Dasper las sias sculpturas è Giacometti er enconuschent per ses maletgs, ses objects e sias graficas.

Il Grischun ha sutvalità Alberto Giacometti

Che la gronda part dallas ovras dad Alberto Giacommetti n'è betg en il chantun Grischun, ha ina simpla raschun. Avant varga 50 onns avess il chantun gì la pussaivladad da cumprar ovras dad Alberto Giacometti.

Da lez temp n'haja il chantun betg vulì investir 1.6 milliuns francs en l'artist oriund da la Bregaglia. Quai di Beat Stutzer, istoricher d’art ed anteriur manader dil museum d’art Grischun.

L'artist Grischun n'era betg uschè enconuschent e popular curt avant on sia mort, malgrà ch'el aveva gia lura gudagnà plirs premis internaziunals. La gronda part da las 150 sculpturas e 20 maletgs dad Alberto Giacometti tutga a la fundaziun Alberto Giacometti ed èn uss en museums a Turitg, Winterthur e Basilea.

Alberto Giacometti tar RTR

Alberto Giacometti, naschì il 1901 en Bergiaglia e mort ils 11 da schaner avant 50 onns a Cuira, è in dals artists ils pli renumnads da 20avel tschientaner. Cun differentas emissiuns e contribuziuns sa regorda RTR a quest artist e persuna extraordinaria.
Tgi era Alberto Giacometti, da tge sa regordan ses amis, tge era sia moda e maniera da lavurar e daco pajan ins oz summas orrentas per sias ovras?

Artitgels legids il pli savens

Scrollar a sanestra Scrollar a dretga