En la Surselva ed il Grischun Central quinta SRF Meteo fin dumengia saira cun fin 140 mm aua per meter quadrat. Sco congual:
En in normal avust datti a Glion passa 100 millimeters plievgia per meter quadrat. I croda damai ils proxims dis 1,5 fin 2 giadas uschè blera plievgia sco quai ch'i dat normalmain durant l'avust.
La pli blera plievgia duai dar en il Mesauc. Là quinta SRF Meteo cun fin a passa 250 mm aua per meter quadrat. Er en la regiun Cuira, en il Partenz u en parts da l'Engiadina poi dar dapli che 100 mm per meter quadrat.
Pli aut privel
Per parts dal Grischun e dal nord en il Tessin vala il pli aut stgalim da privel da malaura (stgalim 5 da 5). L'ultima giada ch'ils servetschs da meteorologia han avertì d'in privel sin il stgalim 5 è stà avant 14 onns. L'onn 2006 avevi dà blera naiv en il sid da las Alps. Il punct culminant da las malauras vegn spetgà sin dumengia, scriva Meteo Svizra.
Tge avertiment vala nua?
Bovas, aquaplaning ed inundaziuns
Tenor ils meteorologs da SRF Meteo è la situaziun tendida, cunquai ch'il cunfin da naiv resta aut – tar 2'700 fin 3'000 meters sur mar. . Quai vul dir, che quasi tut l'aua cula aval. Ils auals s'empleneschan cun quai fitg svelt. Cun quai crescha il privel d'inundaziuns. Er il privel da bovas e da bovas da glitta crescha.
Er cun ir cun l'auto èsi da dar adatg. Pervia dal «aquaplaning» sa prolunghescha la distanza da franar.