Siglir tar il cuntegn

Header

Avieuls.
Legenda: Keystone
cuntegn

Avieuls grischuns Bain en gamba – chariel d'avieuls fa dentant fastidis

Cun ils avieuls grischuns giaja quai bain quest onn, di il cumissari d'avieuls dal chantun, Heini Heusser.

Entras la primavaira ch'è vegnida baud, hajan ils pievels pudì sa sviluppar bain. Plinavant haja er strusch dà scheliras ch'han fatg donns. Uschia ch'ils pievels d'avieuls en Grischun sajan bain vidlonder. Els hajan tenor emprimas stimaziuns er pudì purtar bler nectar per il mel. Il cumissari d'avieuls dal chantun quinta cun in bun onn da racolta. I duria dentant anc 10 dis enfin duas emnas fin che quella è a fin. Uss sajan ins en il spurt final. Sco mintg'onn vegnia er a dar quest onn grondas differenzas regiunalas. Nua ch'igl ha dà quant mel saja uss dentant grev da dir, uschia Heini Heusser.

Malsognas che fan fastidis

Er quest onn hai dà disturbis en tschertas regiuns entras las malsognas da bacteria pesta ascha e la pesta americana. Omaduas èn malsognas che sa derasan svelt e donnegeschan ils pievels. En Surselva hajan ins gì cas da la pesta ascha, uss dentant saja quella puspè tant sco davent, di Heusser che controllescha talas malsognas. En las valladas dal sid è la pesta americana quella che fa magari fastidis. Quest'onn hajan ins dentant er gì bain enta maun quella.

Chariel d'avieuls - parasit asiatic

Pli fitg mal il venter a Heusser fa il chariel d'avieuls (Varroa-Milbe). Quest parasit asiatic è dapi ils onns 1980 en Svizra e sa chasa en las masainas d'avieuls. Sch'il nivel da chariels è memia aut, flaivlenta quel ils pievels uschia che quels crappan pli tgunsch. Il chariel stoppia mintga apicultur mirar da tegnair sut controlla. Perquai datti nà dal chantun in plan d'acziun per decimar quel.

RTR actualitad 07:00