Siglir tar il cuntegn

Header

audio
Lescha da CO2: Dovra il turissem dal Grischun questa lescha
Or da Actualitad dals 11.05.2021.
laschar ir. Durada: 3 minutas 16 Secundas.
cuntegn

Avis dividids en la branscha Lescha da CO2 è in dilemma per il turissem

In Gea a la lescha da CO2 muntass pretschs pli auts per ieli, sco er per custs da renovaziun. D'ina vart saja la protecziun dal clima essenziala per la stagiun d'enviern. Da l'autra vart na sajan blers hoteliers suenter la pandemia dentant betg liquids avunda per investir. In dilemma.

Da principi saja la protecziun dal clima ed ambient fitg impurtant per il turissem. Quai di Ernst Wyrsch, president da la secziun chantunala da HotellerieSuisse. Perquai beneventa el er las ideas en la nova lescha da CO2. Dentant:

Il mumentum da la lescha n'è betg bun. [...] Suenter la pandemia han blers hoteliers sfidas finanzialas.
Autur: Ernst Wyrsch President HotellerieSuisse Grischun

Cun pli paucs giasts e pli paucas pernottaziun, saja la liquiditad in grond problem. A bleras hotelieras e hoteliers manchian simplamain ils raps per far renovaziuns e sbassar uschia las emissiuns da CO2. Er il sustegn ord ils fonds da la lescha da CO2 na surprenda betg tut ils custs.

Perquai saja la lescha in pau in dilemma per la secziun. Ina parola Na dat HotellerieSuisse Grischun perquai betg or. Tenor Wyrsch vegnian var 60% dals hoteliers e hotelieras a dir Gea, 40% vegnian a dir Na – simplamain perquai ch'ils daners manchian.

Sustegn survegn la lescha da Gastro Grischun. La suprastanza ha decis la parola gea, cuntrari a Gastro Suisse che ha decis la parola na. Tenor il president da Gastro Grischun, Ueli Caluori èsi impurtant da guardar en il futur. A lunga vista gida la lescha da CO2. Sch'ins paja dapli per sgular, na vegnan betg pli paucas persunas tar nus, manegia el. Sch'ils turists sajan dentant ch'i vegnan en ina regiun che guarda sin l'ambient, saja quai in motiv per blers da vegnir tar nus.

Pendicularas cleramain a favur da la lescha

Sumegliant sco la gastronomia, vesan era las pendicularas la situaziun. Las Pendicularas Grischunas sustegnan la lescha sco ellas han confermà envers RTR. Per il mument fan las pendicularas passa 90% da la svieuta durant l'enviern. E cler è che la naiv è essenziala per ina buna stagiun d'enviern. In Gea a la lescha saja perquai logic. In Gea muntass dentant er per las pendicularas dapli custs – ellas sajan dentant pertschartas da quellas consequenzas.

L'uniun tetgala per il turissem GrischunVacanzas, na vul cuntrari a tschellas uniuns betg sa posiziunar. Sin dumonda di Grischun Vacanzas ch'els prendian er uschiglio betg posiziun davart votaziuns federalas.

Dossier online

Avrir la box Serrar la box

Sin in clic tut las fatschentas federalas, chantunalas e communalas: rtr.ch/votaziuns

RTR actualitad 17:00

Artitgels legids il pli savens