En il Grischun è il dumber da dischoccupads s’augmentà l’avrigl per 632 sin totalmain 2’630 persunas, cumpareglià cun il mais avant. Quai correspunda ad ina quota da dischoccupaziun da 2,4%. Quai scriva l'Uffizi per industria, mastergn e lavur dal Grischun. Ultra da quai èn vegnidas registradas 1'167 persunas che tschertgan ina plazza, ma che n'èn betg dischoccupadas. Tar las persunas che tschertgan ina plazza che n'èn betg dischoccupadas appartegnan las persunas che sa participeschan a mesiras da furmaziun supplementara e d'occupaziun.
D’attribuir saja quest svilup cunzunt a la fin da la stagiun d’enviern. Il pli grond dumber da dischoccupaziun hajan nudà la gastronomia e l’industria da construcziun. En tut han 1’650 manaschis survegnì indemnisaziuns per lavur reducida en il Grischun. Quella cifra n'è dentant anc betg definitiva, perquai che las interpresas han trais mais temp d'annunziar lavur curta.
Damain dischoccupads en Svizra
En l’entira Svizra è il dumber da dischoccupaziun percunter sa reducì sin 151'279 persunas, pia 6'689 persunas damain ch'il mars. Quai correspunda ad ina quota da dischoccupaziun da 3,3%, sco il Secretariat da stadi per l'economia SECO scriva.
Per bleras firmas e lavurantas e lavurants resta durant la crisa da corona la lavur curta la rait d'agid. Il favrer eran 51'622 firmas pertutgadas da lavur curta, quai èn 4'162 u 8,8% dapli ch'il schaner.
