Il Telesguard ha sa dà fadia, ma forsa avais gia supponì: Il chat d’aur spectacular en il tunnel d’Alvra è er in ov marsch.
Oz n'havain però betg mo nus raquintà ina pulacca - era autras medias en il Grischun han benedì l'emprim d'avrigl cun lur istorgias.
La Quotidiana
Il fegl rumantsch scriva sin pagina 3 ch’ins prevesa a Glion da fabritgar ina via tranter Glion ost e la zona d’industria da Schluein. Dasper quella punt per il traffic èsi er previs da bajegiar ina punt verda, vul dir ina punt per la selvaschina.
Plinavant èsi vegnì communitgà ch’i haja dà in recurs anonim cunter quest project. Il motiv principal per il recurs saja la tema ch’er ils lufs dal Calanda nizzegiassan la passarella per traversar il Rain. Fin uss era quel in cunfin natiral per ils lufs.
Bündner Tagblatt
Il Bündner Tagblatt ha scrit che la sculptura davant il nov Museum d’art a Cuira survegnia vischins.
Dasper la sculptura «die Liegende» da Hans Josephsohn duai quai dar in’ulteriura sculptura cun il num «die Stehende». Questa sculptura saja pir vegnida chattada il 2012 e tutgia al relasch dal sculptur Josephsohn.
Südostschweiz
La Südostschweiz scriva «Über Haldenstein geht das SVP-Sünneli auf». Concret èsi vegnì infurmà che la cussegliera naziunala grischuna Magdalena Martullo-Blocher mida domicil – quai da Turitg en il chastè da Haldenstein.
Quest chastè pudess lura en l’avegnir daventar il center per occurrenzas da la Partida populara svizra.
Ma quai n’è betg avunda. La Südostschweiz ha contactà la cussegliera guvernativa Barbara Janom-Steiner. Ella raquinta, quant grevas che las tractativas sajan stadas per commuventar Martullo-Blocher da pigliar domicil en il chantun Grischun.
