Ils derschaders da Losanna na dattan betg raschun al giugadur da ballape, uschè lunsch sco els entran insumma en materia. Il plogn na saja betg motivà bain avunda e cuntegnia bleras renfatschas pauschalas, stat scrit en la sentenzia publitgada mez da settember.
Tge era capità?
Il 2016 vegn il giugadur recrutà dad in intermediatur. Lez empermetta ch’ins procuria al giugadur ina plazza da lavur, sch’el gioghia per il club. Plinavant survegnia el ina abitaziun gratuita ed ina premia, sche la squadra restia en la segunda liga.
L’abitaziun gratuita ha il giugadur lura propi survegnì. Per ina plazza da lavur ha il club sursilvan dentant betg procurà. Radund quatter mais è il giugadur restà tar il club. Lura ha el purtà plant a la Dretgira regiunala Surselva.
Intermediatur senza dretg da contractar
Las contractivas avevan giugadur ed intermediatur fatg be a bucca. Betg exnum las empermischuns da l'intermediatur èn stadas contestadas avant dretgira, mabain la dumonda, schebain l'intermediatur aveva insumma il dretg da contractar en num dal club – pia sch'el saja stà represchentant dal club.
La Dretgira regiunala ha interrogà sco perditgas l’anteriur president e l’anteriur trenader dal club che han omadus snegà che l’intermediatur aveva il dretg da contractar. In auter giugadur ch’ha era ditg ora sco perditga, ha confermà che l'intermediatur aveva fatg las medemas empermischuns ad el – ma el na possia betg sa regurdar, en tge relaziun che l'intermediatur stevia cun il club.
Tut quai resorta da la sentenzia da la Dretgira chantunala. Lezza aveva dà raschun a la Dretgira regiunala Surselva che ha refusà il plant dal giugadur.
Perditga principala
Davant Tribunal federal ha il giugadur fatg valair, che la Dretgira regiunala avess stuì interrogar anc in auter giugadur sco perditga. Lez avess pudì dir, ch’i saja stà usit tar quest club dad intermediar plazzas e porscher abitaziuns gratuitas. Plinavant avess la dretgira stuì envidar sco perditga era l'intermediatur sez, crititgescha il giugadur.
Ils derschaders a Losanna na dattan betg raschun al giugadur uschè lunsch sco els entran insumma en materia. En la sentenzia stat scrit, che la critica dal giugadur saja memia pauschala e na descrivia betg precis avunda nua che las preinstanzas avessan agì a moda arbitraria.
Plinavant remartga il Tribunal federal ch’era ulteriuras perditgas n’avessan betg exnum midà il verdict da las preinstanzas.
Sentenzia 4A_127/2020, publitgada ils 18 da settember 2020