Sco quai che la banca scriva, saja quest resultat era influenzà entras la vendita da la participaziun vid la Privat Client Bank SA a Turitg. L'afflussiun da novs daners munta a passa 178 milliuns francs, quai ch'è in augment da 0,6%.
L'augment ipotecar (+1,4%) saja medemamain sa sviluppà a moda positiva, scriva la banca. La summa da daners ch'ils clients cun domicil en l'exteriur han retratg, ha pudì vegnir franada e la posiziun sin la fiera indigena rinforzada. Ins haja la pretensiun da vinavant tegnair la banca sin curs da cretschientscha, commetenscha il CEO Alois Vinzenz las cifras dal prim semester.
Banca reducescha danovamain la prognosa
La prognosa per il success commerzial dal 2016 reducescha la banca entant per la segunda giada sin bun 156 milliuns francs. Gia il favrer era quella vegnida currigida engiu sin passa 170 milliuns. Cun in agen chapital da 2,374 milliardas francs tutgia la banca tranter quellas che sajan chapitalisadas il meglier.
Nova participaziun vid la Albin Kistler SA
En connex cun dar enconuschent las cifras da semester, ha la Banca Chantunala Grischuna er communitgà ch'ella sa participeschia vi da la societad per l'administraziun da facultad turitgaisa Albin Kislter SA. La cumpra da la participaziun vegnia sclerida l'emna che vegn.
Il pretsch per la participaziun da 25% numna la banca betg. Ins saja sa cunvegnì davart discreziun. La cumpra saja colliada cun l'opziun d'augmentar la participaziun aifer ils proxims dus u trais onns sin 51%.
RR novitads 07:30
