Siglir tar il cuntegn

Header

Thomas Huber
Legenda: Huber è stà durant tschintg onns commember dal cussegl da banca da la GKB. Tranter auter è el era stà parsura da la cumissiun da controlla. GKB
cuntegn

Banca Chantunala Grischuna Thomas Huber sa retira per immediat

Tar la Banca chantunala grischuna è in commember dal cussegl da la banca stgarpitschà pervia da fatschentas cun ina firma d'investment turitgaisa. Thomas Huber sa retira per immediat dal pli aut gremi da la GKB. Quai ha communitgà la chanzlia chantunala dal Grischun.

Huber reageschia cun quai sin rapports da medias en connex cun in da ses terzs mandats. La regenza grischuna haja acceptà sia demissiun il mardi. Tant per la regenza sco er per la banca saja questa decisiun in mussament per sia professiunalitad ed integritad. Entras la decisiun protegia Huber la reputaziun da la banca.

Huber aveva ils ultims dis numnadamain fatg letras grassas en connex cun cun la firma d'investment turitgaisa Ruvercap. El era tenor ils rapports commember dal cussegl d'administraziun da l'interpresa Batagon, ch'ha para survegnì da la Ruvercap plirs credits. En il medem mument aveva la GKB investì autas summas en Ruvercap. Tenor il portal online «Finenews» sa tracti da radund 70 milliuns francs, il portal metta er en dumonda sia rolla dubla.

«Nagin conflict d'interess»

Sin dumonda respunda la banca chantunala dal Grischun dentant, che Thomas Huber na saja betg stà en in conflict d'interess perquai ch'el n'haja betg savì da las investiziuns da la banca en la Ruvercap. Il cussegl da la banca na saja mai stà involvì en discussiuns ubain decisiuns da questas investiziuns. La banca haja investì en la Ruvercap sco bleras autras bancas ed er cassas da pensiun svizras er.

Il cas Ruvercap

Huber ei president dal Cussegl d'administraziun dad in'interpresa affiliada a Ruvercap cun il num Batagon. Quella aveva survegnì dad ina interpresa da finanziaziun da Ruvercap a Luxemburg autas summas per credits. Cun quels daners ha Batagon silsuenter cumprà en la Serbia ina fabrica da battarias. La summa da cumpra munta dentant be ad in per milliuns francs. Tge ch'è capità cun ils ulteriurs daners n'è tenor il portal online "inside Paradeplatz" betg enconuschent.

Davos Batagon stat l'impressari Dalibor Matic. Quel è vegnì sentenzià dal Tribunal federal perquai ch'el na mainia betg endretg sias fatschentas. La sentenzia cumpiglia tranter auter in'expulsiun dal pajais. Matic na dastga betg pli vegnir en Svizra.

RTR novitads 12:00

Artitgels legids il pli savens

Scrollar a sanestra Scrollar a dretga