Siglir tar il cuntegn

Header

Purtret da Barbara Janom Steiner.
Legenda: Barbara Janom Steiner è l'emprima dunna a la testa da la Banca Naziunala Svizra. Keystone
cuntegn

Banca Naziunala Svizra L’emprima dunna a la testa dal cussegl da la BNS

Barbara Janom Steiner è l’emprima Grischuna, l’emprima Rumantscha ed insumma l’emprima dunna che presidiescha il cussegl da la Banca Naziunala Svizra (BNS). Dapi in onn è ella en uffizi.

Avant che daventar presidenta dal cussegl da la BNS, ha Barbara Janom Steiner guvernà 11 onns ils departaments da giustia e da finanzas dal Grischun. Cumpareglià cun sia lavur d’antruras n’ha ella uss betg pli da timunar e guvernar. La lavur principala dal cussegl da la Banca Naziunala Svizra è da survegliar las fatschentas da la BNS.

Igl è tut in auter mund – il mund da las bancas centralas e da finanzas.
Autur: Barbara Janom Steinerpresidenta dal cussegl da la BNS

Las incumbensas dal cussegl da la BNS èn regladas en la lescha. Qua las pli impurtantas:

  • Il cussegl controllescha e surveglia la gestiun da la BNS.
  • El propona commembers per la direcziun da la BNS – l’elecziun succeda lura entras il Cussegl federal.
  • El decida quant ch’ils commembers dal directori gudognan.
  • El deliberescha il rapport ed il quint annual a maun dal Cussegl federal e da la radunanza generala.

La BNS è atgnamain ina societad d'aczias – dentant tenor lescha speziala. Perquai na pon ins era betg cumparegliar il cussegl da la BNS cun in cussegl administrativ d’ina normala societad d’aczias.

Or da quest motiv na s’exprima Barbara Janom Steiner era betg davart dumondas sco ils tschains negativs u cumpras da devisas per stabilisar il franc svizzer. Las cumpetenzas dal cussegl da la BNS e dal directori èn separadas strictamain.

Jau hai stuì m’inventar da nov en questa funcziun.
Autur: Barbara Janom Steineranteriura cussegliera guvernartiva

Il directori, cun Thomas Jordan a la testa, procura per la part operativa. La BNS è responsabla per la politica monetara e da valuta da la Svizra. Questa lavur ha ella d'ademplir a moda independenta – en l'interess general dal pajais.

RTR actualitad 07:00