Urs Cadruvi turna tar las ragischs, pudess ins dir. El aveva fatg l'emprendissadi da commerzi en ina clinica psichiatrica. Uss vegn el a lavurar tar la Fundaziun Flury, cun l'ospital da Schiers, pliras chasas d’attempads e la Spitex dal Partenz. El sa legria sin la sfida dad esser al timun d’ina interpresa cun 450 collavuraturs, di Urs Cadruvi. Da l’autra vart fetschia quai fitg mal da bandunar la Lia Rumantscha. La lavur per la LR saja ina chaussa dal cor.
Rumantsch Grischun è stà in tema central
Durant ils 9 onns tar la Lia Rumantscha ha Urs Cadruvi gì il grev pensum da tegnair ensemen la Rumantschia durant la dira debatta per e cunter il rumantsch grischun. Tenor il president da la Lia Rumantscha Johannes Flury saja quai grategià fitg bain ad Urs Cadruvi. Plinavant haja el era fatg buna lavur areguard la midada tar ils meds electronics.
Successur u successura cun gronda cumpetenza da manar
Per il president da la Lia Rumantscha Johannes Flury èsi impurtant, ch’era il nov secretari u la nova secretaria haja ina gronda cumpetenza da manar. La persuna stoppia era esser averta e chattar a moda simpla contact cun auters. Impurtanta saja dentant era d’avair ina savida profunda da tut las dumondas che pertutgan la Rumantschia.
RR actualitad 12:00