Siglir tar il cuntegn
Inhalt

Chantun Barbara Janom Steiner è presidenta dal cussegl da banca SNB

Barbara Janom Steiner è la nova presidenta dal cussegl da banca da la banca naziunala svizra. Il Cussegl federal ha elegì ella sco successur da Jean Studer.

purtret da Barbara Janom Steiner
Legenda: Ella è la nova presidenta e cumenza il matg sia nova incumbensa. Keystone

A sia sesida dad oz ha il Cussegl federal elegì la ministra da finanzas dal chantun grischun ch'è anc enfin la fin da l'onn en uffizi sco cussegliera guvernativa. L'emprim da matg 2019 cumenza Barbara Janom Steiner ses nov post. Ella succeda a Jean Studer ch'è dapi il 2007 commember dil cussegl da banca e dapi il 2012 president. El sto sa retrair sin la fin d'avrigl l'auter onn pervia da la limitaziun d'uffizi.

Barbara Janom Steiner ei dapi trais onns commembra dil cussegl da banca ed ei elegida per la perioda tochen il 2020. Sco quei ch'il Cussegl federal fa da savair haja Janom Steiner grondas experientschas ella politica da finanzas e d'economia. Ella enconuschia era bain las sfidas da la banca naziunala entras sia lavur en il cussegl da banca.

Incumbensa dal cussegl da banca

Il cussegl da banca da la banca naziunala ha da survegliar e controllar la direcziun da la banca naziunala che lezza sa tegnia vid las leschas, ils reglaments e las ordinaziuns. Il cussegl ha 11 commembers, da quels elegia il Cussegl federal sis e la radunanza generala tschintg.

Sco nov commember en il gremi ha il Cussegl federal elegì Christoph Ammann, quai per il rest da la perioda d'uffizi 2016 - 2020. Ammann è cusseglier guvernativ dal chantun Berna. Vicepresident dal cussegl da banca resta sco fin qua Olivier Steiner.

RR novitads 18:00