En Grischun ed en las vals da las Alps dal Sid è l'infestiun s'augmentada. En il rest da la Svizra saja l’infestiun però sa reducida. En l'entira Svizra èn 220'000 meters cubic laina da pign daventads in'unfrenda dal bau-scorsa. Quai è pli pauc che l'onn 2015, dentant anc adina dubel uschè bler sco ils onns 2008 enfin 2012. Quai ha communitgà l’institut federal da perscrutaziun da guaud, naiv e cuntrada WSL
Cunzunt la stad 2015 ch’è stada chauda e sitga haja influenzà la derasaziun dal bau-scorsa. Er l'onn passà na saja betg stà meglier cun sias temperaturas chaudas. Pertutgà eran sur tut vals alpinas dal Tessin e dal Grischun.
Memia baud per prognosas
Sco l’infestiun cun il bau-scorsa sa sviluppeschia quest onn, dependia en emprima lingia da l’aura la primavaira e la stad. Uschia èsi tenor l’institut da perscrutaziun anc memia baud per prognosas.
I saja dentant stà chaud e sitg en bleras regiuns uschia che singuls buas sajan gia sgulads. Ma sche las temperaturas sa sbassian anc ina giada ed i plovia anc in pau, lura possia quai puspè franar l'infestiun.
Il WSL cusseglia dentant tuttina da tegnair en egl fitg bain la situaziun. Gist ils pigns (Fichte) che sajan gia infestads stoppian vegnir allontanads enfin fanadur. Lura numnadamain sgola or la nova generaziun da baus-scorsa.
RR novitads 15:00