Siglir tar il cuntegn

Header

video
Comité grischun «Gea per in segund tunnel dal Gottard»
Or da Telesguard dals 12.01.2016.
laschar ir
cuntegn

Chantun Betg dapli traffic, mabain dapli segirtad

Il comité grischun «Gea ad in tunnel da sanaziun al Gottard» ha lantschà ses cumbat a Cuira. Tranter auter eran preschents ils cussegliers naziunals Martin Candinas (PCD), Magdalena Martullo Blocher (PPS) e Duri Campell (PBD). Tenor il comité è in segund tunnel l’unica soluziun.

In segund tunnel sco soluziun a lunga vista

In tunnel da sanaziun duai vegnir fabritgà. Quel pon ins lura duvrar entant ch’ins sanescha il tunnel vegl, sumegliant sco tar il tunnel da l’Alvra. La gronda differenza: Il vegl tunnel da l’Alvra vegn en il futur betg pli duvrà per il traffic cun trens, mabain mo sco tunnel da segirtad.

Tar il Gottard vegnan en futur duvrads omadus tunnels, in per mintga direcziun. Dentant èsi lura mo lubì da duvrar in das dus vials. Quai pervi che quai è vegnì decis uschia da la populaziun. L’auter vial duai star a disposiziun sco vialda segirtad.

Adversaris han tema da dapli traffic

Ils adversaris vulan evitar in segund tunnel. Els han tema che quai procura a lunga vista per dapli traffic al Gottard e ch’ins vegn lura baud ni tard a duvrar omaduas vias en ils dus tunnels. Perquai vulan els er vinavant be in tunnel.

Durant il temp da sanaziun duai il traffic vegnir svià sin tren. Camiuns ed autos duain uschia vegnir transportads cun il tren tras il tunnel Göschenen-Airolo u era tras la NEAT.

Martin Candinas, co-president dal comité «Gea ad in tunnel da sanaziun al Gottard», na persvada quell’idea betg:

L’idea dals adversaris n’è betg mala. Dentant na schlia ella betg cumplettamain il problem. Cunzunt betg a lunga vista.
Autur: Martin Candinas

Uschia na cuntanscha la cuntraproposta betg da transportar tut il traffic actual cun il tren. Quai mussan era cifras da l’Uffizi federal da vias. 900’000 camiuns passan mintg’onn tras il tunnel dal Gottard. Cun la viafier pudess ins dentant mo transportar 600’000 camiuns. Per evitar lungs temps da spetga vegnian uschia 300’000 camiuns per onn a stuair tschertgar in’autra ruta.

Alternativas betg bunas per il Grischun e ses turissem

Ord experientschas tar accidents, nua ch’il tunnel dal Gottard era serrà, enconusch’ins las alternativas. La ruta preferida fiss il San Bernardino. Quella ruta n’è dentant betg adattada per anc dapli traffic. Gia ussa datti numerus accidents. Latiers è il San Bernardino durant l’enviern savens cuvert cun naiv.

Alternativas per ils manischunzs da camiuns fissan era ils Pass da l'Alvra, Güglia u il Flüela. Ils camiuns traversassan l’Engiadina e giessan lura sur il Pass da Malögia en direcziun Italia. Da quai scenari ha il cusseglier naziunal Duri Campell tema:

Per regiuns da turissem n’è dapli traffic da camiuns betg bun. Tgi vul far vacanzas en ina regiun da transit?
Autur: Duri Campell

Era tenor il cusseglier naziunal Martin Candinas, ha in «na» ad in segund tunnel mo aspects negativs: «Dapli traffic fa ch’i daventa pli malsegir sin via. Sch’ils uffants na san betg pli ir sulet a scola en il Valragn u en la Mesolcina, lura sa quai esser in motiv dad ir a star en in’autra regiun. Ina depopulaziun na vulain nus dentant betg.»

Il pievel svizzer decida ils 28 da favrer 2016 davart la sanaziun dal tunnel da Gottard.

RR novitads 12:00

Ils adversaris e lur cumbat

Ils adversaris vegnan a preschentar lur arguments en in’emna a las medias. Lur project cun il transport via binari fiss bunamain ina milliarda pli bunmartgà; pia duas milliardas enstagl da trais. Dentant varieschan ils custs dals dus projects - tut tenor comité.

Artitgels legids il pli savens

Scrollar a sanestra Scrollar a dretga