Differentas represchentaziuns da furmaziuns respectivamain d'artistas e d'artists dal Grischun en la citad veglia da Vevey vegnan a dar la tempra al di chantunal grischun, uschia scriva il departament. Questas preschentaziuns culturalas dal Grischun ch'uneschan tradiziun e moderna, pon tut las visitadras e tut ils visitaders da la festa frequentar gratuitamain e durant tut il di. La visita da la Fête des Vignerons durant il di grischun po vegnir cumbinada cun la visita dals gieus festivs en l'arena.
Ina festa populara unica
Durant questa festa populara che ha lieu dals 18 da fanadur fin ils 11 d'avust 2019, vegnan mussadas la vita e la lavur dals viticulturs en choreografias e paradas. En ina gronda arena per 20'000 aspectaturas ed aspectaturs sin la plazza da martgà da Vevey vegnan mussadas en choreografias ed en paradas impressiunantas la vita e la lavur dals viticulturs.
La «Fête des Vignerons» ha lieu be ina giada per generaziun, l'ultima è stada il 1999. Ella tutga tar il patrimoni cultural immaterial da l’UNESCO.
Contingent da bigliets exclusiv
Per che uschè bleras Grischunas ed uschè blers Grischuns sco pussaivel che van a lur di chantunal, possian er giudair il spectacul en l'arena, han ils organisaturs reservà in contingent da bigliets limità per la populaziun grischuna interessada. Ils bigliets correspundents pon ins cumprar a partir dad oz fin il cumenzament da november 2018.
RR novitads 06:00
