Quai cun las colurs, quai è in clisché, sche era il pli famus. Anc avant pli pauc che 100 onns era quai numnadamain anc viceversa cun las colurs. Lura valeva rosa sco colur tipic masculina e blau sco colur tipic feminina.
Auter èsi dentant cun ils giugarets. Uschia saja quai propi uschia che mats s'interesseschian pli ferm per autos e mattas per poppas, di la psicologa d'uffants e giuvenils da Cuira, Denise Nay.
Genetica ed evoluziun
En pli datti chaussas, ch'èn dadas avant geneticamain ni han sa sviluppadas tras l'evoluziun. Sco chatschaders han ils umens pli baud stuì esser ferms ed avair success, entant che las dunnas han stuì s'occupar dals uffants ed il da chasa. Perquai èsi anc oz uschia, che mats èn pli cumbattants e pli spert aggressivs, entant che mattas provan da chattar cumpromiss en il discurs e d'avair urden.
Auters interess
Tge dentant far, sche la figlia s'interessescha pli fitg per autos ed il figl per poppas? Laschar pruvar ora, manegia la psicologa. Uffants hajan da chattar ora, tge ch'els veglian e tgi ch'els sajan. Dad interrumper damai quai na fetschia nagin segn. Sch'il figl veglia dentant ir anc en la terza classa a scola cun la schocca rosa as stoppia mussar si il cunfin sco geniturs, di Denise Nay. Quai per proteger il mat dals conscolars che pudessan zaclinar el.
Impurtant saja dentant adina, dad ir en sin ils basegns ed ils giavischs da ses uffants. E da tegnair ora e sustegnair els era sche quels èn auters sco quai ch'ins spetga dad els.