Siglir tar il cuntegn
Inhalt

Chantun Boom dad e-mountainbike er en il Grischun

En Svizra è la vendita dad e-mountainbikes creschì il 2014 per 19% sin 13’700 cumpareglià cun l’onn avant. Ed era quest onn vesa quai ora fitg bain cun la vendita dals mountainbikes cun motor era en il Grischun.

Adina pli blers midan sin in mountainbike cun motor – era per betg pli stuair stuschar uschè bler il velo.
Legenda: Adina pli blers midan sin in mountainbike cun motor – era per betg pli stuair stuschar uschè bler il velo. Keystone

Ils affars cun velos da muntogna cun in motor electric quels èn stads fitg buns quest onn. Uschia constatescha per exempel Sepp Hendry da Casutt Velos a Glion in augment da 30 fin 35% cumpareglià cun l’onn avant. Ch’ins ha vendì dapli e-mountainbikes quest onn, conferman era auters affars grischuns, sco per exempel la Imholz Fritz SA a Cuira, la Alpine-Bike Engiadina a Schlarigna ni Gian Duri Carstan da la Bikereria a Scuol e Gian Claudio Livers da Beat Sport a Flem.

13 fin 30% èn e-mountainbikes

Mintga quart velo che la Imholz Fritz SA a Cuira venda quest onn è per exempel in velo cun motor electric: varga la mesadad da quels èn velos da muntogna. Vul pia dir mintga 8avel velo ch'ella venda a Cuira è in e-mountainbike. Tar la Casutt Velos a Glion è quai prest mintga 5avel velo e tar la Alpine-Bike Engiadina a Schlarigna, per numnar in terz exempel, è qua schizunt prest mintga terz velo. Simplifitgà san ins pia dir: 13 fin 30% dals velos vendì quest en il Grischun èn e-mountainbikes.

Er ils giuvens èn pronts

Ina raschun daco che la vendita dad e-mountainbikes è creschida ils ultims onns e ch’ella crescha vinavant èn ils giuvens, vul dir cunzunt quels da 30 onns ensi. Els cumpran ussa er pli stedi in tal velo da muntogna cun motor. Las raschuns d’insumma cumprar in e-mountainbike èn tenor ils vendiders fitg differentas: In fa quai per exempel per prender giu, in auter perquai ch'el vul finalmain pudair far turas da velo ensemen cun ses partenari ch’è pli fit ch’el.