RTR ha discurrì cun il politolog Mark Balsiger, che considerescha Brand sco candidat cun schanzas realas. El haja sustegn en l’atgna partida, ed era a parlamentaris d’autras partidas n’haja el betg zappà tant sin ils pes che ad auters collegas da partida. En ina confruntaziun directa cun Eveline Widmer-Schlumpf saja quai in ulteriur avantatg, ch’el vegnia era dal Grischun.
Balsiger spetga però, che las secziuns chantunalas da la PPS vegnan a preschentar anc tut ina retscha dad ulteriurs nums durant ils proxims mais. Uschia pudess Brand survegnir anc l’in u l’auter ferm concurrent.