Siglir tar il cuntegn

Header

Navigaziun

Pass e carta d'identitad.
Legenda: Pass e carta d'identitad suenter la fusiun: Ina parantesa davos il lieu da burgais cun il num dal lieu d'origin d'avant la fusiun. Keystone
cuntegn

Chantun Breil-Brigels (Vuorz) u Ilanz-Glion (Ruschein)

Valsot, Ilanz-Glion u Breil-Brigels – tut nums da vischnancas fusiunadas. Il pli dumandada era questa pussaivladad suenter l'emprim onn a Vuorz en Surselva. Davart las raschuns sa lascha dentant be specular, ina raschun per far la midada na dovri numnadamain betg.

La statistica da l'onn passà mussa: Oravant tut en la Surselva vegn fatg diever da questa pussaivladad d'agiuntar il num da l'anteriura vischnanca dasper quel da la nova. Da totalmain 211 persunas che han agiuntà il lieu da burgais anteriur en parantesa, sajan 88 da la Surselva, uschia Jon Peider Arquint da l'uffizi per migraziun e dretg civil. Cun 47 dumondas saja Breil la vischnanca cun las pli bleras dumondas insumma.

Dumonda na sto betg vegnir motivada

Davart ils motivs per questa gronda dumonda da Vuorz ed Andiast per l'agiunta tar il pass e la carta d'identitad possian ins be specular. Motivar na stoppian ins numnadamain betg ina dumonda. «Tar Breil po quai esser che la fusiun sco tala ha chaschunà discussiuns. Insaquants han forsa gì reservas encunter la fusiun ed han vulì mussar l'affecziun cun la vischnanca veglia», smina Jon Peider Arquint.

Damai ch'el sappia tge persunas che han precis tschentà las dumondas sa relativeschian questas cifras era in zic. Sch'ina entira famiglia cun ils geniturs, ils uffants maiorens, dumondia per ina tala agiunta crodia quai alura si sch'ins vesia be la cifra.

RR actualitad 07:00