Siglir tar il cuntegn

Chantun Brischar rument è ozendi ina chaussa pulit schubra

Brischar rument n'è betg bun per l’ambient, cunquai che particlas finas vegnan uschia en l'atmosfera. Las brischeras grondas, sco la GEVAG a Trimmis èn dentant uschè modernas che l'emissiun da particlas finas è pitschna.

GEVAG a Trimmis
Legenda: Quasi tut il rumen dal chantun Grischun sa tschenta tar la GEVAG a Trimmis. RTR, G.C. Candinas
In chamin cun fim
Legenda: Quant nuschaivels è il fim ord chamins da brischeras propi? Keystone

Tenor l'uffizi federal d'ambient producescha mintga persuna en Svizra bun 700 kilos rument l'onn. Ina fitg gronda part da quest rument sa tschenta la fin finala tar grondas birscheras. En il Grischun è quai la corporaziun da vischnancas per l'allontanament da rument (GEVAG) a Trimmis. Là vegn il rument alura brischà.

Ma quant ecologica è la brischera a Trimmis?

La brischera a Trimmis è in indriz modern, tecnicamain sin il pli nov stan. Tar il brischament da rument sto vegnir resguardà bleras perscripziuns. Svapurs da tissi dastgan natiralmain betg sortir en l’atmosfera. Per minimar las emissiuns vegnan las svapurs brischadas lavadas e filtradas. Quasi tut las substanzas nuschaivlas pon uschia vegnir allontanadas. Quai saja ina dretga lavur da hightec, di François Boone il schef da la GEVAG.

Per che tut constetti vegni la GEVAG adina puspè controllada. Els hajan da trametter mintga mais datas a l'Uffizi per natira ed ambient dal Grischun. Lez controllescha lura per exempel la concentraziun da particlas finas.

Legende: Video Il transport da rument è il pli grond problem. abspielen. Laufzeit 0:18 Minuten.
Dals 29.06.2016.

Ozendi sajan las brischeras fitg modernas, di Hanspeter Lötscher da l'Uffizi per la natira e l'ambient dal Grischun. Particlas finas na sajan perquai betg pli in uschè grond problem sco pli baud. I vegnia duvrà las pli modernas tecnologias. Tar il transport dal rument vegnia perfin producì dapli particlas finas che tar il brischament, di Lötscher.

Ils autos sin via chaschunan bler dapli particlas finas ch'ina brischera moderna.
Autur: Hanspeter LötscherUffizi per la natira e l'ambient

La siutaziun d'ozendi na pon ins betg cumparegliar cun quella dals onns 60

Enturn ils onns 1960 na vegniva filtrà nagut, di il schef da la GEVAG François Boone. Pir a la fin dals onns 1980 hajan ins fatg in grond pass enavant en quest connex. Ils ultims 20 fin 30 onns saja l’effizienza ecologia natiralmain anc ina giada creschida.

RR actualitad