Siglir tar il cuntegn

Header

Expert da bumbas en in vestgì da protecziun.
Legenda: Be en vestgì da protecziun: Uschia è la neutralisaziun da bumbas in zic pli segira per experts. Reuters
cuntegn

Chantun Bumbas en Grischun – tge lura?

In scenari d’orrur: Ina bumba sisum la Surselva, entasum l’Engiadina, en Surses, a Cuira u en in auter lieu en il Grischun. Per fortuna è quai in scenari che na capita betg savens. Però, era per eventualitads ston ins esser preparà.

Ils purtrets da las attatgas da terror a Brüssel schocheschan. Bumbas en la metro e a l’eroport cun entant almain 31 persunas mortas e passa 300 blessadas. Ina da las bumbas n’è per fortuna betg explodida. Quella han experts pudì metter ord funcziun.

Maximal duas uras fin Cuira

Sche quai fiss da neutralisar ina bumba en il Grischun, lura fissan nus dependents d’experts da Turitg. Ils experts da bumbas en adina semtgads en pichet, e quai 24 uras per di. Tut tenor nua che la bumba sa chatta, po quai dentant durar in temp fin ch’els arrivan.

Fin a Cuira èn ins il pli tard en duas uras, di il pledader da medias da la Polizia da la citad da Turitg, Marco Cortesi. En quest interval è la Polizia chantunala dal Grischun responsabla per la situaziun. La polizia sto guardar ch’il lieu vegn segirà, uschia ch’i na po capitar nagut a nagin.

Scenas sco ord in film

En Svizra datti trais gruppas d’experts ch’èn spezialisadas sin bumbas. Ina gruppa a Turitg, ina a Berna ed ina a Genevra. Ils experts svizzers èn adina en contact cun experts da bumbas da l’entir mund ed èn tut il temp «en scolaziun».

In roboter da dismetter bumbas (archiv, test da la Bundeswehr en Germania, 2012).
Legenda: Neutralisar bumbas cun minimal privel per umans pon ins cun in roboter teleguidà (archiv, test da la Bundeswehr en Germania, 2012). Reuters

Questas scenas datti. En tscherts cas sto in expert sez ir tar la bumba e neutralisar ella. Però dependa quai dal cas. I dat era roboters che pon s’avischinar ad ina bumba cun agid da computers. En ils pli blers cas saja quai però uschia che la bumba vegn destruida dals experts, di Marco Cortesi.

Ils experts n’èn dentant betg mo responsabels per bumbas. Els vegnan per exempel era en acziun sche quai dat explosiuns da gas en chasas u fieus pli gronds.

RTR/fc/alb