Chantun - Bun onn, ma nagin onn da record per bogns e lais - Novitads

Chantun Bun onn, ma nagin onn da record per bogns e lais

Ils blers bogns en las diversas regiuns en il Grischun han gì in bun onn cun bleras entradas. Da l'onn da record, la stad da chalira 2003, èn las cifras dentant lunsch davent.

Autur: Ursin Lechmann

A Savognin è la stagiun stada curta. Enturn il Lai Barnagn vegn numnadamain investì en novs stabiliments. Ma enfin la fin d'avust han ins pudì recaltgar ina uschè gronda svieuta sco l'onn passà enfin la fin d'october. Uschia ch'ils responsabels èn cuntents cun las cifras.

audio

Saira: Stad 2018 – bilantscha dals bogns averts

ord Actualitad dals 10.09.2018.

laschar ir. Durada: 2 minutas 40 Secundas.

Quai vala era per Glion. En il bogn Fontanivas han ins pudì dumbrar 41'200 entradas. Quai èn pli bleras ch'ils davos onns. Ins è dentant anc lunsch davent da l'onn da record, il 2003. Lura avevan ils responsabels pudì dumbrar 68'000 entradas.

Era a Cuira bunas cifras, ma betg a Vulpera

En la chapitala han ins gì ina fitg buna stagiun. Las cifras d'entradas èn pli autas ch'ils davos onns. Ma era qua è l'onn da record, il 2003, lunsch davent. Ins ha quest onn gì 30% pli paucas entradas che lura. Il motiv saja, che l'aura na saja betg stada buna il matg ed il zercladur. Il fanadur e l'avust han ils da Cuira dentant pudì notar fitg bunas cifras.

Auter vesa la situaziun ora a Vulpera. Là è il bogn avert ils mais fanadur ed avust. Il fanadur han ins anc gì fitg bunas cifras, sur la media. Tut auter lura l'avust. Là hajan ins gì in bun cumenzament, silsuenter sajan las cifras dentant stadas sut la media dals ultims onns. Il motiv n'enconuschan ils responsabels betg.