Siglir tar il cuntegn
Inhalt

Chantun Bun settember per hotellaria grischuna

Il settember han ils hotels grischuns dumbrà 10,2% dapli pernottaziuns che l'onn avant. Quai è in pli grond plus che la media svizra: Là han ils hotels nudà 3,2% dapli giasts. Uschia cuntinuescha il trend dals ultims mais nua ch'i ha er adina dà dapli pernottaziuns che l'onn avant.

Legenda:
Pernottaziuns en Grischun: Cliccar sin ils onns per activar e deactivar las lingias per cumparegliar las pernottaziuns da differents onns. Cifras da l'Uffizi federal da statistica (2005-2018)

Il dumber da pernottaziuns è creschì sin 419'207, scriva l'Uffizi chantunal per economia e turissem. Las destinaziuns las pli tschertgadas èn stadas Lai e Mustér/Sedrun. Quai cun in plus da radund 38% en cumparegliaziun cun l'onn avant. A Lai vegnan tranter auter er ils campiunadis mundials da mountainbike ad avair influenzà positivamain il dumber da pernottaziuns.

In grond augment ha er la destinaziun Engiadina San Murezzan pudì nudar cun in plus da 15,4% en cumparegliaziun cun l'onn avant. Quai correspunda a bunamain 19'000 pernottaziuns ed è uschia il pli grond augment effectiv da pernottaziuns da tut las destinaziuns.

Nudà pli paucas pernottaziuns han sulettamain la Bregaglia cun -9,2% e la destinaziun Tavau/Claustra cun -2,4%.

Legende: Video Fitg bun settember per la hotellaria abspielen. Laufzeit 00:47 Minuten.
Or da Telesguard dals 02.11.2018.

Sur la media svizra

Er en l'entira Svizra ha la hotellaria pudì nudar in augment - numnadamain 3,2%. Bunamain la mesadad dals giasts che stattan sur notg èn svizzers. La segund gronda gruppa da giasts èn ils tudestgs. Il settember han ils hotels surtut dumbrà dapli giasts da la China - entant che las pernottaziuns da giasts dals Stadis dal Golf èn sa reducidas.

RR novitads 10:00